އެސްޓީއޯގެ ގެ ޑިރެކްޓަރުންގެ ބޯޑުގައި އާންމު ހިއްސާ ދާރުންގެ ފަރާތުން އިންތިހާބުކުރާ ޑިރެކްޓަރުކަމަށް ކުރިމަތިލުމުގެ ފުރުސަތު އެކުންފުނިން ހުޅުވާލައިފިއެވެ.

އެސްޓީއޯ އިން ކުރި އިއުލާނެއްގައި ބުނީ އެ ކުުންފުނީގެ ހިންގާ ގަވާއިދުގައި ބަޔާންކޮށްފައި ވާގޮތުގެމަތީން، އަދި ކުންފުނީގެ ހިއްސާ ބެހިފައިވާ ނިސްބަތަށް ބަލާއިރު، ޑިރެކްޓަރުންގެ ބޯޑަށް އާންމު ހިއްސާދާރުންގެ ފަރާތުން އެއް ޑިރެކްޓަރު އަދި ސަރުކާރު ނުވަތަ މައި ހިއްސާ ދާރުގެ ފަރާތުން ހަ ޑިރެކްޓަރުން އިންތިހާބު ކުރެވޭކަމަށެވެ.

މިގޮތަށް އިންތިހާބު ކުރެވޭ އެ ކުންފުނީގެ ބޯޑަށް އިންތިހާބު ކުރެވޭ ހުރިހާ ޑައިރެކްޓަރުންނަކީ ވެސް ވިޔަފާރިއާއި ހިންގުމުގެ ދާއިރާއިން އެކަށީގެންވާ ތައުލީމާއި ތަޖުރިބާ ލިބިފައިވާ ފަރާތްތަކަކަށް ވުމާއި އެކު، ކުންފުނީ ގެ ބޯޑަށް ވީހާވެސް ގިނަ އަންހެނުން ޝައުޤުވެރިކަން ފާޅުކޮށް، އިންތިހާބުގައި ވާދަކުރުމަކީ އެ ކުންފުނިން ބާރުއަޅާ ކަމެއް ކަމަށް ވެސް އެ އިއުލާންގައި ވެއެވެ. އަދި މިއީ މިންތީގެ ހަމަހަމަކަން ޤާއިމްކުރުމަށް އެސްޓީއޯ އިން ކުރަމުން ގެންދާ މަސައްކަތަށް އިތުރު ހިތްވަރެއް ލިބިގެންދާނެ ކަމެއްކަން ވެސް އެ ކުންފުނިން ވަނީ ފާހަގަކޮށްފައެވެ.

Advertisement

އެސްޓީއޯގެ އާންމު ހިއްސާ ދާރުންގެ ފަރާތުން އިންތިހާބުކުރާ ޑިރެކްޓަރުކަމަށް ކުރިމަތިލާ ފަރާތެއްގެ ކިބައިން ފުރިހަމަވާން ޖެހޭ ޝަރުތުތައް އިއުލާން ގައި ހިމަނާފައިވާއިރު، ޝަރުތުތައް ފުރިހަމަވާ ފަރާތްތަކުން، މި މަގާމަށް ކުރިމަތިލުމަށް އެދި ހުށައަޅާ "ބޯޑު ޑިރެކްޓަރުކަމަށް ކުރިމަތިލުމަށް އެދި ހުށަހަޅާ ފޯމް" އަދި އެ ފޯމުގައި ބަޔާންކޮށްފައިވާ އެންމެހައި ލިޔެކިޔުންތަކެއް ފުރިހަމަ ކުރުމަށްފަހު، 8 އޭޕްރީލް 2024 ވާ ހޯ މަ ދުވަހުގެ 14:00 ކުރިން އެ ކުންފުނީގެ ސެކްރެޓޭރިއަޓަށް އެޑްރެސްކުރުމަށްފަހު މެއިލް ކުރުމަށް އެސްޓީއޯގެ އިއުލާންގައި ވަނީ އެދިފައެވެ.

މި ފޯމު އެސްޓީއޯގެ ވެބްސައިޓުން ޑައުންލޯޑް ކުރެވޭނެ ކަމަށާއި، މި މަގާމަށް ކުރިމަތިލާ ފަރާތްތަކުގެ ތެރެއިން ޝަރުތު ހަމަވާ ފަރާތްތައް އިންޓަވިއު ކޮށް، ކޮމިޓީން މިކަމާއި ގުޅިގެން ތައްޔާރުކުރާ ރިޕޯޓް އެ ކުންފުނީގެ ޑިރެކްޓަރުންގެ ބޯޑަށް ހުށަހަޅައި، އެ ބޯޑުން ކަނޑައަޅާ ގޮތެއްގެ މަތީން ޑިރެކްޓަރުކަމަށް ކުރިމަތިލާފައިވާ ފަރާތްތަކާބެހޭ މަޢުލޫމާތު ހިއްސާދާރުންނަށް ފޯރުކޮށްދިނުމަށް ވަނީ ހަމަޖެހިފައިކަމަށް އެސްޓީއޯ އިން ބުނެއެވެ. 

އެސްޓީއޯގެ އާންމު ހިއްސާދާރުން ތަމްސީލުކުރާ ޑިރެކްޓަރު ހޮވުމަށް ހަމަޖެހިފައިވަނީ އަހަރީ އާންމު ޖަލްސާގައި ހިއްސާދާރުންގެ މެދުގައި ނަގާ ވޯޓަކުންނެވެ.