ކުރީގެ ރައީސް އިބްރާހީމް މުހައްމަދު ޞާލިހުގެ ސަރުކާރުން ކުރިއަށް ގެންދިޔަ ބިންވެރިޔާ ސްކީމްގެ ދަށުން ހުޅުމާލެ އިން ގޯތިތައް ދީފައި ހުރީ ކަރަންޓާއި، ފެނާއި، ނަރުދަމާ ނެޓްވޯކް މަތިން ކަަމަށް އެޗްޑީސީން ބުނެފިއެވެ.
މިކަން ހާމަކޮށް އެޗްޑީސީން އާއްމު ކުރި ވީޑިއޯއެއްގައި އެ ކޯޕަރޭޝަންގެ ޕަބްލިކް ރިލޭޝަން އެސިސްޓެންޓް މެނޭޖަރ މުހައްމަދު ސިރާޖު ވިދާޅުވީ، މި ސްކީމްގެ ދަށުން ބިން ދޫކުރުމުގެ މަސައްކަތް އެ ކުންފުނިން ކުރަމުންދާއިރު، ބިން ލިބުނު ބައެއް ފަރާތްތަކަށް ބިން ހަވާލު ކުރެވި، އިންފާރު ރޭނުމުގެ މަސައްކަތް މިހާރު ކުރެވެމުންދާ ކަމަށެވެ.
"އެހެން ނަމަވެސް އަޅުގަނޑުމެންނަށް ދިމާވެފައި ހުރި ބައެއް ހުރަސްތަކާއި ހުރެ ބައެއް ފަރާތްތަކަށް އިން ވަކިކޮށް، ބިން ހަވާލު ކުރުމުގައި ލަސްކަމެއް އެބަހުރި، އެގޮތުން ބިންވެރިޔާ ސްކީމްގެ ދަށުން ދޫކޮށްފައި ހުރި ބައެއް ގޯތިތަކުގެ ތެރެއިން ފެނާއި ކަރަންޓާއި ނަރުދަމާގެ ވިއުގައި ގޮސްފައި އެބަހުރި. ބައެއް ގޯތިތައް އެބަ ހުރި މަގުތަކަށް ވާގޮތަށް ދޫކޮށްފައި ".
އެހެންކަމުން އެފަދަ މައްސަލަތައް ހުރި ގޯތިތައް ދޫކުރުމުގެ ކުރިން މި ނެޓްވޯކްތައް ގޯތިތަކުގެ ތެރެއިން ނާރާނެ ގޮތަށް އެހެން ތަނަކަށް ބަދަލު ކުރުމުގެ މަސައްކަތް ކުރަން ޖެހޭ ކަމަށް ސިރާޖް ވިދާޅުވިއެވެ. އަދި މި މަސައްކަތްތައް ސްޓެލްކޯ އާއި އެމްޑަބްލިވްއެސްސީއާ ގުޅިގެން ކުރަމުންދާ ކަަމަށްވެސް އޭނާ ވިދާޅުވިއެވެ.
"ރޭވުންތެރިކަމާއެކު ސާވިސް ލައިން ބަދަލުކޮށްގެން ނޫނީ މި ސަރަހައްދުން ދޫކޮށް ހުރި ގޯތިތައް ކަނޑައަޅާ ބިންވެރިންނާއި ހަވާލު ކުރުމަކީ ވަރަށް ދަތިކަމެއް، އިން ވަކިކޮށް ބިން ހަވާލު ކުރުމުގައި ދިމާވާ ހުރަސްތައް ނައްތާލާ ގޮންޖެހުންތައް ހައްލުކޮށް ގޯތީގެ ވެރިންނާއި ބިން ހަވާލު ކުރުމުގެ މަސައްކަތް އެޗްޑީސީގެ ފަރާތުން ކޮށްދޭނެ ކަމުގެ ޔަގީންކަން ތިޔަބޭފުޅުންނަށް އަރުވަން،".
މި ސްކީމްގެ ދަށުން ގޯތި ދޫކޮށްފައި ވަނީ ހުޅުމާލެ 2 އާއި އަލަށް ހިއްކާ ހުޅުމާލެ ތިނަކާއި ގުޅިފަޅާއި ގިރާވަރުފަޅުންނެވެ. އެތަންތަނުން 9،000 ގޯތި ދޭނެއެެވެ.
Advertisement
This content is created and paid for by advertisers and does not involve Voice Journalists
