ސިވިލް މުވައްޒަފުންގެ ތެރެއިން ސްޕެޝަލް ޑިޔުޓީ އެލަވަންސް ލިބޭ މުވައްޒަފުންނަށް އިތުރުގަޑީގެ ފައިސާ ދިނުމުގެ އުސޫލަށް ސިވިލް ސަރވިސް ކޮމިޝަނުން ބަދަލުގެނެސްފިއެވެ.
މިކަމާއި ގުޅިގެން ސިވިލް ސާވިސް ކޮމިޝަން (ސީއެސްސީ) އިން ބުނީ، ސްޕެޝަލް އެލަވަންސް ލިބޭ މުވައްޒަފުންނަށް އިތުރު ގަޑީގެ އިނާޔަތް މީގެ ކުރިން ދެމުން ދިޔައީ، މަހެއްގެ މައްޗަށް 44 ގަޑިއިރަށް ވުރެ އިތުރު ގަޑީގައި މަސައްކަތް ކުރުމުން ކަމަށެވެ.
ނަމަވެސް، އަލަށް ގެނައި ބަދަލުން، ސްޕެޝަލް ޑިއުޓީ އެލަވަންސް ލިބޭ މުވައްޒަފުންނަށް ރަސްމީގަޑި ހަމަވުމުން އިތުރު ގަޑީގައި ކުރާ ހުރިހާ މަސައްކަތަކަށް އިތުރު ގަޑީގެ އިނާޔަތް ލިބޭނެ ކަމަށް ބުނެފައިވެއެވެ.
ސިވިލް ސަރވިސް ކޮމިޝަނުން އިތުރަށް ބުނެފައިވާގޮތުން، އިތުރުގަޑީގެ ފައިސާ ދިނުމުގެ އުސޫލަށް ގެނެވުނު ބަދަލަކީ ސްޕެޝަލް ޑިއުޓީ އެލަވަންސާ ގުޅިގެން އިތުރުގަޑީގެ ފައިސާ އުނިވާ ގޮތަށް އޮންނަ އޮތުމަކީ ވަޒީފާއާ ބެހޭ ގާނޫނާއި ޚިލާފު މާއްދާއެއް ކަމަށް ފާހަގަވުމުން އެކަން އިސްލާހުކުރުމަށެވެ.
ސްޕެޝަލް ޑިއުޓީ އެލަވަންސް އަކީ އައު ޕޭ ސްޓްރަކްޗާއަށް ބަދަލު ނުވެ ތިބި ހުރިހާ މުވައްޒަފުންނަށް ލިބޭ އެލަވަންސްއެކެވެ. އެގޮތުން، ސިއްހީ ދާއިރާ އަދި ތައުލީމީ ދާއިރާގައި މަސައްކަތްކުރާ އިދާރީ މުވައްޒަފުންނާއި އަދި އެހެނިހެން ސެކްޓާގައި މަސައްކަތްކުރާ މުވައްޒަފުންނަށް މި އެލަވަންސް މިހާރު ލިބެއެވެ.
Advertisement
This content is created and paid for by advertisers and does not involve Voice Journalists
