މާލޭ ސިޓީގެ ޑެޕިއުޓީ މޭޔަރު އަޙުމަދު ނަރީޝްއަށް ދިން ހަމަލާ މާލޭ ސިޓީ ކައުންސިލުން ކުށްވެރިކޮށްފިއެވެ.
ނަރީޝްއަށް ހަމަލާ ދީފައިވަނީ ޕީޕީއެމް، ޕީއެންސީގެ ފަރާތުން ކޮލަމާފުށި ދާއިރާއަށް ވާދަކުރައްވާ ކެންޑިޑޭޓް އިބްރާހީމް ދީދީގެ ކެމްޕެއިން ހަރަކާތައް ގއ.މާމެންދޫއަށް ވަޑައިގެން އުޅުއްވަނިކޮށެވެ.
މިކަމާ ގުޅިގެން ސިޓީ ކައުންސިލުން ނެރުނު ނޫސްބަޔާނުގައި މި ޢަމަލު އެންމެ ހަރުކަށި އިބާރާތުން ކުށްވެރިކޮށްފައި ވާއިރު، މިކަން ކުރި ބަޔަކު ވީ އެންމެ އަވަހަކަށް އިންސާފުގެ ކުރިމައްޗަށް ގެނައުމަށް ދިވެހި ފުލުހުންގެ ހިދުމަތަށާއި ކަމާބެހޭ ފަރާތްތަކަށް ވަނީ ގޮވާލާފައެވެ.
ފުލުހުން މީޑިއާތަކާ ހިއްސާކުރި މެސެޖެއްގައިވާ ގޮތުން ނަރީޝަށް ހަމަލާދިން ކަމުގެ މައުލޫމާތު އެ އިދާރާއަށް ލިބުނީ އިއްޔެ ހަވީރު 17:00 ހާއިރެވެ.
މި މައްސަލައިގައި ނަރީޝަށް ހަމަލާ ދިންކަމަށް ތުހުމަތުކުރެވޭ ފަރާތް ފުލުހުންގެ ބެލުމުގެދަށަށް ގެނެސްފައިވާ ކަމަށާއި މި މައްސަލަ އިތުރަށް ތަޙްގީގުކުރަމުންދާ ކަމަށް ފުލުހުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
