ބިންވެރިޔާ ސްކީމްގެ ދަށުން ދޫކޮށްފައިވާ ގޯތިތަކަށް އަރާގޮތަށް ގެންގޮސްފައިވާ ނަރުދަމާ ހޮޅިތައް އެހެން ސަރަހައްދުތަކަށް ބަދަލުކުރުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީން) ފަށައިފިއެވެ.

އެޗްޑީސީން ބުނީ، ބިންވެރިޔާ ސްކީމްގެ ދަށުން ދޫކޮށްފައިވާ ޕްލޮޓްތަކުގެ ތެރެއިން ފެނާއި ނަރުދަމާގެ ވިއުގައަށް އަރާ ގޮތަށް ދޫކުރެވިފައިވާ ޕްލޮތްތަކަށް ނާރާ ގޮތަށް ސާވިސް ލައިން ބަދަލުކުރުމުގެ އަމަލީ މަސައްކަތް ފަށާފައިވާ ކަމަށެވެ.

މި މަސައްކަތް ފެށީ އެޕްލޮޓުތައް ދިނުން އަވަސް ކުރުމަށްކަމަށް އެޗްޑީސީން ބުނެއެވެ. މިމަސައްކަތް އެޗްޑީސީން ފަށާފައިވަނީ އެމްޑަބްލިއުއެސްސީއާއި ގުޅިގެންނެވެ.

Advertisement

އެޗްޑީސީގެ މެނޭޖިންގ ޑިރެކްޓާ، އިބްރާހީމް ފަޒުލް ރަޝީދު ވިދާޅުވީ, އެ ސްކީމާ ގުޅިގެން ހުރި މައްސަލަތައް ހައްލުކޮށް, ގޯތިތައް ވީހާވެސް އަވަހަކަށް ދޫކުރުމުގެ މަސައްކަތް ކުރައްވަމުން ގެންދަވާކަމަށެވެ. އަދި މި ގޯތިތަކަކީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގެ އެންމެ ފަހު ދުވަސްކޮޅު ހުޅުމާލެ ދެވަނަ ފިޔަވަހިން ދޫކޮށްފައިވާ ގޯތިތަކެވެ.

މި ނަރުދަމާ ހޮޅިތަކަކީ ނިމިދިޔަ ސަރުކާރުގެ ބިންވެރިޔާ ސްކީމްގެ ދަށުން ދޫކޮށްފައިވާ ގޯތިތަކަށް އަރާގޮތަށް ގެންގޮސްފައިވާ ނަރުދަމާ ހޮޅިތަކެކެވެ.