ސަރުކާރު ކޯލިޝަން ޕީޕީއެމް/ޕީއެންސީގެ ލަޝްކަރު ވަރުގަދަކޮށް، ގައުމު ބިނާ ކުރެއްވުމުގައި ކޯލިޝަންގެ ލީޑަރު އަދި ޕީއެންސީގެ ރައީސް، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ހުންނަވާނެ ކަމަށް އެޗްޑީސީގެ މެނޭޖިން ޑިރެކްޓަރ އިބްރާހިމް ފަޒުލް ރަޝީދު ވިދާޅުވެއްޖެއެވެ.
ފަޒުލް މިފަދައިން ވިދާޅުވީ، ޕީޕީއެމް/ޕީއެންސީއަށް އެއްވެސް ދިރުމެއް ރައީސް ޑރ. މުޢިއްޒު ދޭން ބޭނުންފުޅުނުވާ ކަމަށް ކުރީގެ ރައީސް ޢަބްދުﷲ ޔާމީން އަބްދުލްގައްޔޫމް ވިދާޅުވުމާއި ގުޅިގެން އެކްސްގައި ކުރެއްވި ޕޯސްޓެއްގައި އެވެ.
މިގޮތުން ފަޒުލް ވިދާޅުވީ، ރައީސް މުއިއްޒު ރިޔާސީ އިންތިހާބު ކާމިޔާބު ކުރެއްވީ ޕީޕީއެމް/ޕީއެންސީ މަގުމަތިނުކޮށް ދިވެހީންގެ ރާއްޖެ އަށް ދަތުރުކުރުމަށް ހިތްވަރާއި ކެތްތެރިކަމާއި އެކު މަސައްކަތްކޮށްގެން ކަމަށެވެ.
"ޕީޕީއެމް/ޕީއެންސީގެ ލަޝްކަރު މަގުމަތިނުކޮށް އިންތިހާބު ބޮއިކޮޓް ނުކޮށް، ދިވެހީންގެ ރާއްޖެ އަށް ދަތުރުކުރުމަށް ހިތްވަރާއި ކެތްތެރިކަމާއި އެކު މަސައްކަތްކޮށް އިންތިހާބު ކާމިޔާބު ކުރެއްވި އަދުގެ ރައީސް މުއިއްޒު ޕީޕީއެމް/ޕީއެންސީ ލަޝްކަރު ވަރުގަދަކޮށް ގައުމު ބިނާ ކުރުމުގައި ދެމިހުންނާނެ. އިންޝާ ﷲ."
ފަޒުލް ވިދާޅުވިއެވެ.
ފަޒުލް މިފަދައިން ވިދާޅުވެފައިވާއިރު، ޕީޕީއެމް/ޕީއެންސީ ކޯލިޝަންގެ ލީޑަރޝިޕްގައި ހިމެނޭ ގިނަ ބޭފުޅުންތަކެއް ވަނީ ރައީސް ޔާމީންގެ މިވާހަކަފުޅުތަކަށް ރައްދު ދެއްވާފައެވެ. މިގޮތުން ޕީޕީއެމްގެ ނައިބު ރައީސް އަދި ދިފާޢީ ވަޒީރު މުޙައްމަދު ޣައްސާން މައުމޫން ވެސް ވަނީ ޕީޕީއެމް/ޕީއެންސީގެ ސަފުތަކަށް ހީނަރުކަން ނާންނަކަމަށާއި، އެދެޕާޓީގެ ސަފުތައް އޮތީ ވަރަށް ބަދަހިކޮށްކަމަށް ވިދާޅުވެފައެވެ.
މީގެ އިތުރުންވެސް ޣައްސާން ވަނީ ޕީޕީއެމުން ދަނީ ރައީސް މުއިއްޒުގެ ފަހަތްޕުޅުގައި ސާބިތުކަމާއި އެކު ވަރުބަލިކަމެއް ނެތި ހަރަކާތްތެރިވަމުންކަމަށާއި ދެޕާޓީގެ ސަފުތަކަށް ހީނަރުކަން ނާންނަކަމަށް ވިދާޅުވެ، އެފަދަ ވިސްނުމެއް ދެޕާޓީގެ ލީޑަރޝިޕްގެ ވެސް ނުގެންގުޅޭކަމުގެ ޔަގީންކަން ވެސް ދެއްވާފައެވެ.
Advertisement
This content is created and paid for by advertisers and does not involve Voice Journalists
