މަސްތުވާތަކެތި ބޭނުންކުރާ މީހުންނަށް އޮތް އެންމެ މުހިންމު ޙައްލަކީ ކޮމިއުނިޓީ ބޭސްޑް ރިހެބިލިޓޭޝަން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ "ރައީސްގެ ވާޖިބު" ޕްރޮގްރާމުގައި، މއ. ބޯޅަކިންކިރިމާގޭ އާއިޝަތު ޝެރީން، މަސްތުވާތަކެތި ބޭނުންކުރާ މީހުންނަށް ފަރުވާދީ އަނބުރާ މުޖުތަމަޢަށް ގެނައުމަށް ސަރުކާރުން ގެންގުޅޭ ސިޔާސަތާ މެދު ސުވާލުކުރެއްވުމުންނެވެ.

ވަކި ރަށްތަކެއް ކަނޑައަޅުއްވާ، ރާއްޖޭގެ އެކި ސަރަހައްދުތަކުގަ ރަނގަޅު ފެންވަރުގެ މަރުކަޒުތައް ޤާއިމުކުރެއްވުމަށް ނިންމަވާފައިވާކަމަށްވެސް ރައީސް ވިދާޅުވިއެވެ. އަދި ސަރުކާރުން ހިންގާ އެކިއެކި މަޝްރޫޢުތަކުގައިވެސް ޢަމަލީގޮތުން ބައިވެރިވެ މުޖުތަމަޢަށް އެނބުރި އާދެވޭނެ ގޮތަށް ތަމްރީނު ދެވޭނެކަންވެސް ރައީސް ފާހަގަ ކުރެއްވިއެވެ.

މަސްތުވާތަކެތީގެ މައްސަލައަކީ އަދު ދިވެހި މުޖުތަމަޢުގައި އިންތިހާ ދަރަޖައަށް ގޮސްފައިވާ މައްސަލައެކެވެ. މިކަމުގެ ސަބަބުން ވައްކަމާއި މާރާމާރީ ފަދަ އެހެން ބޮޑެތި ކުށްތައްވެސް ދަނީ އިތުރުވަމުންނެވެ. ޅަފުރާގައިވެސް ބައެއް ކުދީން މަސްތުވާތަކެތި ބޭނުންކުރަން ފަށާއިރު، އެކުދީން، އަލުން އަނބުރާ މުޖުތަމަޢަށް ގެނެސް، މި މައްސަލައަށް ދާއިމީ ޙައްލެއް ގެނައުމަށް ވަނީ ކޮންމެހެންވެސް ބޭނުންޖެހިފައެވެ.