ސައިޕްރަސް އިން ޣައްޒާއަށް ކަނޑުމަގުން އެހީ ފޯރުކޮށްދިފިއެވެ.

ޔޫއޭއީ ގެ އެހީއާއި އެކު ސައިޕްރަސް އިން ވަނީ ކަނޑުމަގުން ޣައްޒާއަށް 400 ޓަނުގެ ކާނާ އާއި އެހެނިހެން އެހީގެ ތަކެތި ހިމެނޭހެން ތިން ބޯޓުގެ އެހީ ފޮނުވާފައެވެ. އިއްޔެ ފުރި މި ބޯޓުތަކުގެ އެހީ ޣައްޒާއާއި ހަމައަށް ފޯރުކޮށްދޭނީ މުދާ އުފުލާ ބޯޓަކާއި ސެލްވޭޖް އުޅަނދަކުން ޓޯ ކުރާ ޕްލެޓްފޯމަކުންނެވެ.

މިތަކެތި ތައްޔާރު ކުރުމުގައި ހަރަކާތްތެރިވި ޖަމިއްޔާއެއްް ކަމަށްވާ ވޯލްޑް ސެންޓްރަލް ކިޗަން (ޑަބްލިއު ސީ ކޭ) އިން ބުނީ ކާބޯތަކެތީގެ ތެރޭގައި ހިމެނޭނީ ހަނޑުލާއި، ޕާސްތާ އާއި ފުށާއި ތަރުކާރީ ފަދަ ތަކެތި ކަމަށެވެ. އެހީގެ ގޮތުގައި ފޯރުކޮށްދިން މި ތަކެތިން 1 މިލިއަނަށް ވުރެ ގިނަ މީހުންނަށް ކާތަކެތި ތައްޔާރު ކުރެވޭނެ ކަމަށާއި، މި ތަކެތީގެ އިތުރުން ގިނަ އަދަދެއްގެ ކަނދުރުވެސް ފޮނުވާފައިވާނެ ކަމަށް އެ ޖަމިއްޔާ އިން މައުލޫމާތު ދެއެވެ.

އެހީގެ ތަކެތި ޣައްޒާގެ ބަނދަރަށް ބޭލުމަށްޓަކައި ސައިޕްރަސް އިން ވަނީ އެހީގެ ތަކެއްޗާއި އެކު 2 ފޯކްލިފްޓާއި 1 ކްރޭން ވެސް ވަނީ ޣައްޒާއަށް ފޮނުވާފައެވެ. މިއީ ކުރިއަށް އޮތް ތަނުގައި ޣައްޒާއަށް ކަނޑުމަގުން އެހީ ފޯރުކޮށްދޭ އެހެން ގައުމުތަކަށް ވެސް ފަސޭހަކަމާއި އެކު އެކަން ކޮށްދިނުމަށްޓަކައި އެ ގައުމުން ފަހި ކޮށްދިން ކަމެކެވެ.

މީގެ ކުރިން މިމަހުގެ 16 ވަނަ ދުވަހު ސްޕެއިން އިން ވެސް ވަނީ ޣައްޒާއަށް 200 ޓަނުގެ ކާތަކެތީގެ އެހީ ފޮނުވާފައެވެ. އެތަކެތި ޣައްޒާއަށް ފޯރުކޮށްދިނުމަށްޓަކައި ޖެޓީއެއް ނެތުމުން އެކި ތަކެތި ބޭނުންކޮށްގެން ވަގުތީ ޖެޓީ އެއް އޭރު ވަނީ ހަދާފައެވެ.

ކާބޯތަކެތި ކަނޑުމަގުން ފަސޭހަ ކަމާއި އެކު ޣައްޒާގެ ރައްޔިތުންނަށް ފޯރުކޮށްދިނުމަށްޓަަކައި އެމެރިކާއިން ވަނީ ފްލޯޓިން ބަދަރެއް ހެދުމަށް ވެސް ނިންމާފައެވެ. މިކަމާއި ގުޅޭ މައުލޫމާތު ދެއްވަމުން ސައިޕްރަސް ގެ ރައީސް ނިކޯސް ކްރިސްޓޮޑޫލިޑޭސް ވިދާޅުވީ މި ބަނދަރު ނިންމުމަށް އަމާޒު ހިފާފައިވަނީ މޭމަހުގެ 1 ވަނަ ދުވަހަށް ވީ ނަމަވެސް އެންމެ ލަސްވެގެން އޭޕްރިލް 15 ހިސާބުގައި އެ ބަނދަރު ބޭނުން ކުރެވޭވަރު ވާނެ ކަމަށެވެ.

މި ގައުމުތަކުގެ އިތުރުންވެސް އެެމެރިކާއިން ވެސް ވަނީ ދާދި ފަހުން ވައިގެ މަގުން ޣައްޒާއަށް 100,000 ޕައުންޑް ގެ އެހީ ވައްޓާލާފައެވެ. ނަމަވެސް މިފަދައިން އެހީގެ ތަކެތި ވައްޓާލުމުގެ ސަބަބުން މި ތަކެތީގެ ދަށުވުމާއި މި ތަކެތި ހޯދުމަށް ކަނޑަށް އެރުމުގެ ސަބަބުން މީހުން ޝަހީދުވެ، ޒަހަމްވާތީ މިކަމާއި ގުޅިގެން އިންސާނީ އެހީއާއި ބެހޭ ޖަމާއަތްތަކުން އަންނަނީ ފާޑުކިޔުންތައް އަމާޒު ކުރަމުންނެވެ.

ކަނޑާއި ވައިގެ މަގުން ޣައްޒާއަށް ފޯރުކޮށްދޭ އެހީގެ ތަކެތިން ފުދޭ ވަރު ނުވާނެތީ ކަމާ ބެހޭ ފަރާތްތަކުން އަންނަނީ ޣައްޒާއަށް އިތުރު އެހީ ފޯރުކޮށްދިނުމުގެ މަގުފަހު ކުރުމަށް އިސްރާއީލަށް ގޮވާލަމުންނެވެ.

މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ޣައްޒާއަށް ޔަހޫދީން ދެމުން އަންނަ އުދުވާނީ ހަމަލާތަކުގެ ސަބަބުން ޣައްޒާގެ 80 އިންސައްތަ އަށް ވުރެ ގިނަ މީހުން އަންނަނީ ބަނޑުހައިހޫނު ކަމުގެ ވޭން ތަހައްމަލު ކުރަމުންނެވެ. ހަނގުރާމަ ހުއްޓާލައި، އިންސާނީ އެހީ ޣައްޒާއަށް ފޯރުކޮށްދިނުމާއި ބެހޭ ގަރާރެއް ދާދި ފަހުން އދ ގެ ސަލާމަތާއި ބެހޭ މަޖިލީހުން ފާސްކުރި ނަމަވެސް އެ ގަރާރަށް އިސްރާއީލުން އަމަލުކޮށްފައެއް ނުވެއެވެ.