ރައްޔިތުންގެ މަޖިލީހަށް މެމްބަރަކު އިންތިހާބުވާ ޕާޓީ ބަދަލުކޮށްފިނަމަ އެ މެމްބަރުގެ ގޮނޑި ގެއްލެން ޖެހޭ ކަމަށް %73 މީހުން ގަބޫލުކުރާ ކަމަށް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރުސީއެމް) އިން ހެދި ސާވޭ އަކުން ދައްކައިފިއެވެ.

މިއީ ރައްޔިތުންގެ މަޖިލީހުގެ އިންތިޚާބު 2024އާ ގުޅިގެން އާންމުންގެ ޚިޔާލު ހޯދުމަށް ހިއުމަން ރައިޓްސް ކޮމިޝަނުން ކުރިއަށް ގެންދިޔަ ސާވޭ އެކެވެ.

އެގޮތުން ސާވޭގައި ބައިވެރިވި %47 މީހުން ވަކި ޕާޓިއެއްގެ ކެނޑިޑޭޓެއްގެ ގޮތުގައޮ ހޮވޭ މެމްބަރަކު އެހެން ޕާޓީ އަކަށް ބަދަލު ވެއްޖެ ނަމަ ގޮނޑި ގެއްލެން ޖެހޭ ކަމަށް ވަރަށް ބޮޑަށް ގަބޫލު ކުރާއިރު، %26 މީހުން ވަނީ މި ފަދައިން ގޮނޑި ގެއްލެން ޖެހޭ ކަމަށް ގަބޫލު ކޮށްފައެވެ. މެދުމިނުގައި %11 މީހުން ހުރި އިރު، %16 މީހުން ވަނީ މިފަދައިން ވާން ޖެހޭ ކަމަށް ގަބޫލު ނުކުރާކަމަށް ބުނެފައެވެ.

މީގެ އިތުރުންވެސް، މި ސާވޭގެ ބައިވެރިންގެ ތެރެއިން %68 މީހުން މަޖިލިސް މެމްބަރުންގެ އަދަދު މަދު ކުރަން ޖެހޭ ކަމަށް ބުނެފައިވާއިރު، %63 މީހުން ބުނެފައިވަނީ މަޖިލީހުގައި އަންހެން މެމްބަރުން މަދު ކަމަށެވެ.

ހަމަ އެއާއި އެކު މި ސާވޭގައި ވޯޓަށް ނުފޫޒު ފޯރުވުމުގައި އެންމެ ބޮޑު "އަންޑިއު އިންފްލުއެންސް" އަށް ވެސް ވަނީ އަލިއަޅުވާލާފައެވެ. މިކަމާއި ގުޅިގެން ބައެއް މީހުން ބުނީ:

1) މުއައްސަސާތަކާއި ސަރުކާރު ހިއްސާވާ ކުންފުނިތަކުން ވަޒީފާ ދިނުން - %50

2) އިންތިހާބާއި ކައިރިވެފައިވަނިކޮށް ސަރުކާރުގެ ޕްރޮޖެކްޓްތައް އިއުލާންކުރުން - %27

3) ޕާޓީގެ ސިޔާސީ ހަރަކާތްތަކުގައި ދައުލަތުގެ މުދަލާއި ތަކެތި ބޭނުންކުރުން - %14

4) ރަސްމީ ދަތުރުތަކުގައި ކެމްޕޭން ގެ މަސައްކަތްކުރުން - %9

އެޗްއާރުސީއެމުން މި ސާވޭ ކުރިއަށް ގެންގޮސްފައިވަނީ މާޗު އެއްވަނަ ދުވަހުން ފެށިގެން ނުވަވަނަ ދުވަހުގެ ނިޔަލަށެވެ. މި ސާވޭގައި ޖުމްލަ 1،174 މީހުން ވަނީ ބައިވެރިވެފައެވެ.