ނިރުބަވެރި ޔަހޫދީން ޣައްޒާއަށް ހަމަލާދިނުމަށް އެންމެ ފަހުގެ ޓެކްނޮލޮޖީ ވަސީލަތެއް ކަމަށްވާ އާޓިފިޝަލް އިންޓެލިޖެންސް (އޭއައި) ބޭނުންކުރާކަމަށް ރިޕޯޓްތައް ބުނެފިއެވެ.

ޔަހޫދީން ޣައްޒާއަށް ދޭ ހަމަލާތައް ސީދާ އަމާޒަށް ވާސިލްކުރުމަށް ބޭނުންކުރާ މި އޭއައި ޑިވައިސް އަށް ކިޔަނީ "ލެވެންޑަރ" ކަމަށާއި މި ޑިވައިސް ބޭނުންކޮށްގެން ދޭ ހަމަލާތައް އޭގެ އަމާޒަށް ވާސިލުވާނެ ކަމުގެ %90 ޔަގީންކަން އޮތް ކަމަށް ވެސް މި ކަމުގެ އިންވެސްޓިގޭޝަން ހާމަކުރި ޕްލަސް 972 މެގަޒިން އިން ބުނެއެވެ.

މި ޑިވައިސް އިން ހަމަލާ އަމާޒުކުރާ ކޮންމެ ޓާގެޓަކަށް ބޮން އެޅުމަށް ހޭދަ ކުރާނީ 20 ސިކުންތު ކަމަށްވާއިރު، މިއީ ހަމާސް ނައްތާލުމަށް ހާއްސަކޮށް ހަދާފައިވާ އެއްޗަކަށް ވާތީ މީގެން ހަމަލާދެނީ ފިރިހެނުން ފާހަގަކުރުމަށްފަހުގައި ކަމަށް ވެސް އެ ނޫހުން ބުނެއެވެ.

މި އިންވެސްޓިގޭޝަން ހާމަކޮށްފައި މިވަނީ ހައްދުފަހަނައަޅާފައިވާ އިސްރާއީލުން ޣައްޒާގައި އެހީ ފޯރުކޮށްދިނުމަށް މަސައްކަތްކުރި އެތައް ބަޔަކަށް ހަމަލާދިނުމާއި ގުޅިގެން، އިސްރާއީލަށް ހަތިޔާރު ފޯރުކޮށްދިނުން ހުއްޓާލުމަށް އިނގިރޭސިވިލާތަށް އެތައް ބަޔަކު ގޮވާލަމުންދާ ދަނޑިވަޅެއްގައެވެ.

ޔަހޫދީން ރޭގަނޑުގެ ވަގުތު ޣައްޒާއަށް ދޭ ހަމަލާތައް އިތުރުކުރަމުން އަންނައިރު، މިގޮތުން ރޭގަނޑު ހަމަލާދޭއިރު، ހަމަލާދެނީ އާއިލާތައް ގޭގައި ތިބޭ ވަގުތުގައިއެވެ. މިދިޔަ އޮކްޓޫބަރު މަހު ޣައްޒާއަށް ޔަހޫދީން ހަމަލާދޭން ފެށިފަހުން މިހާތަނަށް ބަރުދަނުގައި 2000 ޕައުންޑް ހުރި ސަތޭކަ އަށް ވުރެ ގިނަ ބޮން ވައްޓާލާފައިވާއިރު، މިއީ ޣައްޒާ ފަދަ އާބާދީ ބޮޑު ތަނެއްގައި މީހުން އަލުން އާބާދުވުމަށް އެތައް ގަރުނެއް ނަގާނެފަދަ އަނިޔާވެރި އަމަލެކެވެ.

ޔަހޫދީން ޣައްޒާ އާއި މެދު ހިންގަމުން އަންނަ ލާއިންސާނީ ހަމަލާތަކުގެ ސަބަބުން ޣައްޒާގެ ހަތަރުބައި ކުޅަ ތިންބައި މީހުން އަންނަނީ ބަނޑުހައިހޫނު ކަމުގެ ވޭން ތަހައްމަލު ކުރަމުންނެވެ. އަދި ނިރުބަވެރި ޔަހޫދީ ސިފައިން ކެނޑިނޭޅި ޣައްޒާއަށް ދެމުންއަންނަ ހަމަލާތަކުގައި މިހާތަނަށް 32,916 މީހަކު ޝަހީދުވެފައިވާއިރު، އޭގެ ތެރޭގައި ގިނައީ އަންހެނުންނާއި ކުޑަކުދިންކަން ފާހަގަކޮށްލަން ޖެހެއެވެ.