ޣައްޒާގައި ހަރަކާތްތެރިވަމުންދިޔަ އެހީތެރިންތަކަކަށް އަމާޒުކޮށް ޔަހޫދީން ދިން ހަމަލާ ދިވެހި ސަރުކާރުން ކުށްވެރިކޮށްފިއެވެ.

ޣައްޒާގައި ހުންނަ "ވޯލްޑް ސެންޓްރަލް ކިޗަން" ގައި މަސައްކަތްކުރާ އެހީތެރިންތަކަކަށް އަމާޒުކޮށް ދިން މިހަމަލާގައި 7 މީހުން ޝަހީދުކޮށްލާފައިވާއިރު، މިކަމާއި ގުޅިގެން ޚާރިޖީ ވުޒާރާއިން ނެރުނު ނޫސް ބަޔާނުގައި ވަނީ ވަކި ބަޔަކަށް އަމާޒުކޮށްގެން މިފަދަ ޙަމަލާތައް ދިނުމަކީ ބައިނަލްއަޤްވާމީ ޤާނޫނުތަކާވެސް ޚިލާފުކަމެއްކަން ފާހަގަކޮށް މި އަމަލު ހަރުކަށި އިބާރާތުން ކުށްވެރިކޮށްފައެވެ.

ޣައްޒާގައި މިފަދައިން އެހީތެރިކަން ފޯރުކޮށްދިނުމަށް މަސައްކަތްކުރަމުންދާ ފަރާތްތަކަށް ރައްކާތެރިކަމާއި ސަލަމާތްތެރިކަން ޔަގީންވާން ޖެހޭކަން ފާހަގަކޮށް، އެ ވުޒާރާއިން ނެރުނު ބަޔާނުގައި ޔަހޫދީން ޣައްޒާއަށް އިންސާނީ އެހީތެރިކަން ފޯރުކޮށްދިނުމަށް ހުރަސް އަޅަމުންދާތީ އެކަން ވަނީ ހަރުކަށި އިބާރާތުން ކުށްވެރިކޮށްފައެވެ.

Advertisement

ދިވެހި ސަރުކާރުން ވަނީ މި ހަމަލާގައި މަރުވި މީހުންގެ ޢާއިލާތަކުގެ މެންބަރުންނަށާއި "ވޯލްޑް ސެންޓްރަލް ކިޗަން" އަށް ދިވެހި ސަރުކާރާއި ރައްޔިތުންގެ ނަމުގައި ވަނީ ތަޢުޒިޔާ ފޮނުއްވާފައެވެ.

ވޯލްޑް ސެންޓްރަލް ކިޗަން އަކީ ދާދި ފަހުން ސައިޕްރަސް އިން ޣައްޒާއަށް ކަނޑުމަގުން ފޯރުކޮށްދިން އެހީގެ ތަކެތި ފޯރުކޮށްދިނުމުގައި ވެސް އިސްކޮށް ހަރަކާތްތެރިވި ޖަމިއްޔާއެއް ކަން ފާހަގަކޮށްލަން ޖެހެއެވެ.

ޔަހޫދީން ޣައްޒާގައި މަސައްކަތްކުރާ އެހީތެރިންނަށް އަމާޒުކޮށް ހަމަލާތައް ދެމުންއަންނައިރު، މިދިޔަ މަހު އދ އިން ޣައްޒާއަށް ކާބޯތަކެއްޗާއި އެނޫންވެސް އެހީގެ ތަކެތި ފޯރުކޮށްދޭ މަރުކަޒަކަށް ވެސް ހަމަލާދީ އެތައް ބަޔަކު ވަނީ ޝަހީދުކޮށްލާފައެވެ.