މާލެ އާއި ހުޅުމާލޭގައި ފުލުހުން ހިންގި ހާއްސަ އޮޕަރޭޝަންތަކެއްގެ ތެރެއިން 2021 ވަނަ އަހަރުގެ ޑިސެންބަރު މަހުގެ 12 ވަނަ ދުވަހު ރާއްޖެއަށް 119 ކިލޯގެ މަސްތުވާތަކެތި އެތެރެކޮށް ވިޔަފާރިކުރާކަމަށް ތުހުމަތު ކުރެވުނު ތިން މީހުންގެ ތެރެއިން ދެ މީހުންގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުން ނިންމާފައިވަނިކޮށް، މި މައްސަލަ އާއި ގުޅުން ހުރި ތަފްސީލުތައް ސީސީޓީވީ ފޫޓޭޖް ތަކާއި އެކު ފުލުހުން ހާމަކޮށްފިއެވެ.

މިދިޔަ އަހަރު ޑިސެމްބަރު 12 ގައި މާލޭގެ މަގުމަތިން ޓެކްސީއެއް ހުއްޓުވައި، ޓެކްސީންނާއި އިތުރު ކާރަކާއި ސައިކަލެއްގައި ފޮރުވާފައި ހުއްޓާ އަތުލައިގަތް 119 ކިލޯގެ ޑްރަގުގެ މައްސަލައިގައި ދައުލަތުން ޑައިމޯފިން ޓްރެފިކް ކުރުމުގެ ދައުވާ އުފުލާފައިވަނީ ގދ. ހޯނޑެއްދޫ ތިން މީހުން ކަމަށްވާ އަލީ ޒުބައިރާއި އަހުމަދު ސުނައިނާއި އަހުމަދު މުޖާހިދުގެ މައްޗަށެވެ.

މި މައްސަލައިގެ ތަފްސީލުތައް ފުލުހުން ހާމަކޮށްފައިމިވަނީ 119 ކިލޯގެ މަސްތުވާ ތަކެތީގެ މައްސަލައިގައި ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ދެއްކި ވީޑީއޯ ޕްރެޒެންޓޭޝަނެއްގައެވެ.

Advertisement

މިގޮތުން މި ރިޕޯޓުގައި މަސްތުވާތަކެތި އުފުލަން ފިހާރައިން ފޮއްޓާއި ދަބަސް ގަންނަން ދިޔަ މަންޒަރުތަކާ އެކު ފޮށިތައް ގެއިން ނެރެގެން, ފަޅުގައި އޮތް ލޯންޗަށް އަރުވާ މަންޒަރު ފެންނަ ސީސީޓީވީ ފުޓޭޖް ވަނީ ދައްކާލާފައެވެ. 

ފުލުހުން ބުނީ، ފުލުހުންގެ އިންޓެލިޖެންސަށް, މާލެ ދެކުނު ފަރާތު ބަނދަރު ސަރަހައްދުން ދެމީހަކު ޓެކްސީއަކަށް މަސްތުވާ ތަކެތި އަރުވައިގެންދާ ކަމަށް ލިބުނު މައުލޫމާތާއި ގުޅިގެން މި ޓެކްސީ ހުއްޓުވައި، ބަލާ ފާސްކުރި އިރު ޓެކްސީ ތެރެއިން އަހްމަދު ސުނައިނު އާއި އަލީ ޒުބައިރު ފުލުހުންގެ ބެލުމުގެ ދަށަށް ގެންދިޔަ ކަމަށެވެ. ހަމަ އެއާއި އެކު ޓެކްސީގެ ފަހަތު ޑިކީން ފޮއްޓަކާއި ދަބަހެއް ފުލުހުން ނަގާ ބެލި އިރު، ފޮށިން 2،819.8 ގްރާމް ޑަޔަމޯފިން ހުރި 24 ރަބަރު ޕެކެޓް ފެނިފައިވާއިރު، ދަބަހުން ވެސް ޑަޔަމޯފިން ވަނީ ފެނިފައެވެ. ދަބަހުން ފެނުނީ ބަރުދަނުގައި 3،877.2 ގްރާމް ހުރި ތިން ޑަޔަމޯފިން ޕެކެޓް ކަމަށް ވެސް ފުލުހުން މައުލޫމާތު ދެއެވެ.

ހަމައެއާއިއެކު، މި މައްސަލައިގައި ތުހުމަތު ކުރެވޭ އަލީ ޒުބައިރު އާއި މުހައްމަދު އަކްރަމް އަބްދުލް ހަންނާން އާއި ދެމީހުން ދުއްވި ސައިކަލުގެ މަޑިދަށުގައި އޮތް ދަބަހަކުން ވެސް ފުލުހުން ވަނީ ބަރުދަނުގައި 3،877.2 ގްރާމް ޑަޔަމޯފިން ހުރި ހަތަރު ރަބަރު ޕެކެޓް ހޯދާފައެވެ.

މީގެ އިތުރުންވެސް މި މައްސަލައިގައި ބަލާ ފާސްކުރި އިތުރު ކާރަކުން ފުލުހުން ވަނީ 45،754.4 ގްރާމް ޑަޔަމޯފިން ހުރި 46 ރަބަރު ޕެކެޓު އަޅާފައިހުރި ފުޅި މަދު ތިން ފޮށިގަނޑަކާއި ބަރުދަނުގައި 39،781 ގްރާމް ހުރި ޑަޔަމޯފިން އަލާފައިވާ 40 ރަބަރު ލާފައިވާ ދެ ދަބަސް ހޯދާފައެވެ. ފުލުހުން ބުނީ މިކާރު އެރޭ ދުއްވާފައިވަނީ އަހުމަދު މުޖާހިދު ކަމަށެވެ.

ފުލުހުން ބުނީ މި ތަކެތި ރާއްޖެއަށް އެތެރެކޮށްފައިވަނީ މުހައްމަދު އަކްރަމް އަބްދުލް ހަންނާން ގަނެފައިވާ "ބަންގާ" ނަމަކަށް ކިޔާ ލޯންޗުން ކަމަށެވެ.

މި މައްސަލައިގެ މައުލޫމާތު ފުލުހުންނަށް ލިބުމުގެ ކުރިން، މައްސަލައިގައި ތުހުމަތު ކުރެވޭ މުހައްމަދު އަކްރަމް އަބްދުލް ހަންނާން ރާއްޖެއިން ބޭރަށް ފުރައިގެން ގޮސްފައިވާއިރު،އަދިވެސް އެނބުރި ރާއްޖެ ނާންނަ ކަމަށާއި، އޭނާގެ ހަބަރެއް ނުވާކަމަށް އާއިލާ މީހުން ވަނީ ފުލުހުންގެ ތަހުގީގުގައި ބުނެފައެވެ.

119 މަސްތުވާތަކެތީގެ މައްސަލައިގައި މިދިޔަ މަހު ކްރިމިނަލް ކޯޓުން ކުރި ހުކުމްގައި ބުނެފައިވަނީ ކުށް ސާބިތުވަނީ ހަމައެކަނި އަލީ ޒުބައިރުގެ މައްޗަށް ކަމަށެވެ. މި ހުކުމްގައި ކްރިމިނަލް ކޯޓުން ވަނީ އޭނާގެ މައްޗަށް ކުށް ސާބިތުވާވަރަށް އެކަށިގެންވާ ހެކި ހުރިކަމަށް ބުނެ، އޭނާ އުމުރަށް ޖަލަށް ލުމާއެކު އެއްލައްކަ ރުފިޔާއިން ޖޫރިމަނާ ކުރުމަށް ހުކުމްކޮށްފައެވެ. އަލީ ޒުބައިރުގެ މައްޗަށް އުމުރުދުވަހުގެ ޖަލު ހުކުމެއް އިއްވާފައިވަނީ ޝަރީއަތް ނިމެންދެން ދެ އަހަރާއި ތިން މަހާއި އަށް ދުވަސް އެ މުއްދަތުން އުނި ކުރުމަށްފަހުއެވެ.

މި މައްސަލައިގައި ކުށް ސާބިތު ނުވާކަމަށް ކްރިމިނަލް ކޯޓުން ކަނޑައެޅި ސުނައިނު އާއި މުޖާހިދު، އަލީ ޒުބައިރު އާއި ވާހަކަ ދެއްކިކަން ސާބިތުކޮށްދީފައިނުވާ ކަމަށާއި ސުނައިނު އާއި މުޖާހިދުއާ ދެކޮޅަށް ޝަރީއަތަށް ސާބިތުވާ ވަރަށް އެކަށިގެންވާ ހެއްކެއް ހުށަހަޅާފައިނުވާކަން ހުކުމުގައި ބުނެފައިވެއެވެ.

މި ތިން މީހުންނާއި ދެކޮޅަށް ދައުލަތުން 56 ހެއްކެއް ހުށައަޅާފައިވާއިރު، ސުނައިހު އާ މުޖާހިދުގެ މައްޗަށް ކުށް ސާބިތުނުވާ ކަމަށް ކަނޑައަޅާފައި ވަނީ ދައުލަތުން ހުށަހަޅާފައިވާ ސީސީޓީވީ ފުޓޭޖުން ފެންނަނީ އެ ދެމީހުންކަން ސާފުނުވާތީ ކަމަށާއި ކޯލް ރެކޯޑިން އާއި ސެލް ލޮކޭޝަން އެނގޭނެ ލިޔުމާއި ނަންބަރުތަކުގެ ވެރިފަރާތްތައް އެނގޭނެ ލިޔުންތައް ކޯޓަށް ހުށަހަޅާފައިނުވާކަން ހުކުމްގައި ވަނީ ފާހަގަކޮށްފައެވެ. މީގެ އިތުރުން ވެސް، މަސްތުވާތަކެތި ބަންދުކޮށްފައި ހުރި ޕެކެޓުން ފެނުނީ ހަމަ އެކަނި ޒުބައިރުގެ އިނގިލީގެ ނިޝާން ކަމަށްވެސް ކްރިމިނަލް ކޯޓުން ކުރި ހުކުމުގައި ބުނެފައިވެއެވެ.

ކްރިމިނަލް ކޯޓުގެ މި ހުކުމާއި ގުޅިގެން މިފަދަ ކޭސްތައް ރިވިއު ކޮށް، ރައްޔިތުންނަށް ތަފްސީލު ހާމަކޮށްދިނުމަށް ދިވެހި ފުލުހުންގެ ޚިދުމަތަށް ދަންނަވާފައިވާނެ ކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާން ވަނީ މީގެ ކުރިން ވިދާޅުވެފައެވެ.