އެމެރިކާގެ ރައީސް ޖޯ ބައިޑަންގެ އިންޒާރަށް ފަހު، ޣައްޒާއަށް އެހީ ފޯރު ކޮށްދޭ އެއްގަމު ބައެއް މަގުތައް ވަގުތީ ގޮތުން ހުޅުވާލަން  ޔަހޫދީން ނިންމައިފިއެވެ.

އިސްރާއީލުން މި ފިޔަވަޅު ނަގާފައިވަނީ ދާދި ފަހުން ވޯލްޑް ސެންޓްރަލް ކިޗަން ގެ މަސައްކަތްތެރިން ތަކެއް ޣައްޒާގައި އެހީ ފޯރުކޮށްދިނުމުގެ މަަސައްކަތް ކުރަމުން ދަނިކޮށް، ޔަހޫދީން ދިން ހަމަލާއެއްގައި، އޭގެ ތެރެއިން އެތައް ބަޔަކު މަރުވުމާއި ގުޅިގެން ބައިޑަން އާއި އިސްރާއީލުގެ ހައްދުފަހަނަ އަޅާފައިވާ ބޮޑު ވަޒީރު ބެންޖަމިން ނަތަންޔާހޫ އާއި ދެމެދު ދިޔަ "ހޫނު" ފޯން ކޯލަކަށް ފަހުއެވެ.

މި ފޯން ކޯލުގައި ބައިޑަން ވަނީ ހަނގުރާމަ ވަގުތުން ހުއްޓާލުމަށާއި، ޣައްޒާއަށް އެހީ ފޯރުކޮށްދިނުމަށް ހުރަސް އަޅައިފިނަމަ އެމެރިކާ އާއި އިސްރާއީލާއި ދެމެދުގައި އޮންނަ ސިޔާސީ އަދި އަސްކަރީ އެހީތެރިކަމަށް ބޮޑެތި ބަދަލު ތަކެއް ގެންނާނެ ކަމަށް ބުނެފައެވެ.

Advertisement

މިއާއި އެކު ނަތަންޔާހޫ ވަނީ ޣައްޒާއަށް އެހީގެ ސާމާނު ވެއްދުމަށް ވަގުތީ ގޮތުން އަސްދޫދް ބަނދަރާއި އަރީޒް ބޯޑަރުން އެހީ ވައްދަން ފުރުސަތު ދޭނެ ކަމަށް ބުނެފައެވެ. މިއީ ޔަހޫދީން ޣައްޒާއަށް ހަމަލާ ދޭން ފެށިފަހުން މި ތަންތަން ހުޅުވާލާ ފުރަތަމަ ފަހަރެވެ.

މި ދެ މަގުގެ އިތުރުން ކަރެމް އަބޫ ސަލީމް ގެ ބޯޑަރުން ދަތުރުކުރާ އުރުދުންގެ އެހީގެ އަދަދު ވެސް އިތުރުކުރާނެ ކަމަށް ޔަހޫދީން  ވަނީ އިއުލާން ކޮށްފައެވެ.

މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ޔަހޫދީން ޣައްޒާއަށް ދެމުން އަންނަ ލާއިންސާނީ ހަމަލާ ތަކުގެ ސަބަބުން ޣައްޒާގެ 80 އިންސައްތަ މީހުން ވަނީ ބަނޑުހައިހޫނު ކަމުގެ ވޭނާއި ކުރިމަތިލާން ޖެހިފައެވެ. ޣައްޒާއަށް އެހީ އެތެރެކުރުމަށް ދަތިކޮށްފައިވާއިރު، އެހީ ބަހާ ތަންތަނަށް އާންމުން އެއްވުމުން އިސްރާއީލުގެ އަނިޔާވެރި ސިފައިން ދަނީ އެމީހުންނަށް އަމާޒުކޮށް ހަމަލާ ދެމުންނެވެ. އޭގެ ތެރޭގައި އެހީ ފޯރުކޮށްދޭން މަސައްކަތް ކުރާ އެހީތެރިން ވެސް ހިމެނެއެވެ.

އެގޮތުން ވޯލްޑް ސެންޓްރަލް ކިޗަން އަށް ދިން ހަމަލާގެ އިތުރުން މިދިޔަ މަހު އދ އިން ޣައްޒާއަށް ކާބޯތަކެއްޗާއި އެނޫންވެސް އެހީގެ ތަކެތި ފޯރުކޮށްދޭ މަރުކަޒަކަށް ވެސް ޔަހޫދީން ހަމަލާދީ އެތައް ބަޔަކު ވަނީ ޝަހީދުކޮށްލާފައެވެ.

މި ހަމަލާތަކާއި ގުޅިގެން، ނިރުބަވެރި އިސްރާއީލަށް ހަތިޔާރު ފޯކޮށްދިނުން އިނގިރޭސި ވިލާތުން ހުއްޓާލުމަށް އެތައް ބަޔަކު އަންނަނީ ގޮވާލަމުންނެވެ.