އއ. ރަސްދޫ ގައި ކުޑަކުއްޖަކަށް އަނިޔާކުރި މައްސަލަ ވަރަށް ސީރިއަސް މައްސަލައެއްގެ ގޮތުގައި ތަހުގީގުކުރާނެ ކަމަށް ފުލުހުން ބުނެފިއެވެ.
ރަސްދޫގެ މިސްކިތެއްގެ ވުޟޫ ކުރާ ސަރަހައްދުގައި ކުޑަކުއްޖަކަށް ގަނާކޮށް، އަނިޔާ ކުރާ ވީޑިއޯއެއް ރޭގެ ވަގުތެއްގައި ވަނީ ސޯޝަލް މީޑިއާގައި ދައުރުވެފައެވެ. މި މައްސަލަ އާއި ގުޅިގެން ކޮމިޝަނަރ އޮފް ޕޮލިސް އަލީ ޝުޖާއު އެކްސްގައި ކުރެއްވި ޕޯސްޓެއްގައި ވިދާޅުވީ މިހާތަނަށް ލިބިފައިވާ މައުލޫމާތުން އެއީ އއ.ރަސްދޫގައި ހިނގި ކަމެއްކަން ޔަގީން ކުރެވޭ ކަމަށާއި މިކަން ވަރަށް ސީރިއަސް މައްސަލައެއްގެ ގޮތުގައި ބަލާނެ ކަމަށެވެ.
މިކަމާއި ގުޅިގެން ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިހްސާން ވެސް ވަނީ ކަންބޮޑުވުން ފާޅުކުރައްވާފައެވެ. މިގޮތުން ވަޒީރު ވިދާޅުވީ، މި މައްސަލައިގައި ޝާމިލްވާ ފަރާތްތަކަށް ފިޔަވަޅު އެޅުމަށް ފުލުހުން މަސައްކަތް ކުރަމުންދާ ކަމަށެވެ. އަދި ވަޒީރު އިހްސާން ވަނީ، މިފަދަ ކަންކަން މުޖުތަމައުގައި ހިންގާ ފަރާތްތަކާއިމެދު އެޅެންއޮތް އެއްމެ ހަރުކަށި ފިޔަވަޅު އެޅިގެންދާކަމުގެ ޔަގީންކަން ދެއްވާފައެވެ.
ހަމައެއާއިއެކު، ވަޒީރު އިހުސާން ވިދާޅުވީ، ކުޑަކުއްޖާ އަށް ގަނާކޮށް، އަނިޔާކުރިކަމަށް ތުހުމަތު ކުރެވޭ 14 އަހަރުގެ ކުއްޖަކާއި 13 އަހަރުގެ ކުއްޖަކު ފުލުހުން ދެނެގަނެފައިވާ ކަމަށާއި، މި މައްސަލާގައި ޤާނޫނީ ގޮތުން ކުރަން ޖެހޭކަންކަން ކުރަމުން އަންނަ ކަމަށެވެ.
ސޯޝަލް މީޑިއާގައި ދައުރުވަމުންދާ ވީޑިއޯގައި ކުޑަ ކުއްޖާ އަށް އަނިޔާ ކުރާ މަންޒަރުތައް ފެންނައިރު، މިއީ ބަލަން އުދަނގޫ އަދި ކުޑަކުއްޖާގެ ކަރާމާތަށް އުނިކަން އަންނާނެ ފަދަ މަންޒަރުތަކަކަށް ވުމާއި އެކު މި ވީޑިއޯ އެކަކު އަނެކަކަށް ހިއްސާ ނުކުރުމަށާއި ސޯޝަލް މީޑިއާ ތެރޭގައި ދައުރު ނުކުރުމަށް ފުލުހުން ވަނީ އެދިފައެވެ.
ފުލުހުން ބުނީ އަނިޔާ ލިބުނު ކުއްޖާއަށް ބޭނުންވާ ސައިކޯ ސޯޝަލް ސަޕޯޓު ފޯރުކޮށްދިނުމުގެ މަސައްކަތް ކަމާބެހޭ އިދާރާތަކާއި ގުޅިގެން ކުރަމުން އަންނަ ކަމަށެވެ.
މި މައްސަލަ އާއި ގުޅިގެން، އެތައް ބަޔަކު އަންނަނީ މިކަމުގައި ޝާމިލްވާ ފަރާތްތަކަށް ހައްގު އަދަބު ދިނުމަށް ގޮވާލަމުންނެވެ.
Advertisement
This content is created and paid for by advertisers and does not involve Voice Journalists
