ރާއްޖޭގެ  އިސްލާމިކް ޔުނިވާސިޓީ (އައިޔޫއެމް)ގައި މަސައްކަތް ކުރައްވާ ފަލަސްތީނުގެ ޕްރޮފެސަރ ޑރ.ކުރްދީގެ އާއިލާ ޣައްޒާއިން ނެރުމަށްޓަކައި ބޭނުންވާ ފައިސާ އިންޓަނޭޝަނަލް އެއިޑް ކެމްޕެއިން (އައިއޭސީ) އިން ފޯރުކޮށްދީފިއެވެ.

އައިއޭސީން އެކްސް ގައި ކުރި ޕޯސްޓެއްގައި ބުނީ،  ޑރ.ކުރްދީގެ އާއިލާ ޣައްޒާއިން މިސްރަށް ނެރުމަށް އެ ޖަމިއްޔާއިން ކުރަމުންދާ މަސައްކަތުގެ ތެރެއިން އެ އާއިލާ ޣައްޒާއިން ނެރުމަށްޓަކައި ދައްކަންޖެހޭ ފައިސާ ޑރ.ކުރްދީ އާއި ހަވާލު ކުރެވިފައިވާ ކަމަށެވެ.

މީގެ އިތުރުންވެސް، އައިއޭސީން ބުނީ ޑރ.ކުރްދީގެ އާއިލާ މިސްރަށް އައުމުން، އެ އާއިލާ ދިވެހިރާއްޖެ ގެނައުމަށް ކުރަންޖެހޭ ހަރަދުތަށްވެސް ކުރުމަށް ހަމަޖެހިފައިވަނީ އައިއޭސީން ކަމަށެވެ.

ޑރ.ކުރްދީގެ އާއިލާ ޣައްޒާގައި ދިރިއުޅެމުން އައި ގެޔަށް ޔަހޫދީން ބޮން އަޅައި ސުންނާފަތި ކޮށްލުމުގެ ސަބަބުން، އެއާއިލާ ދިރިއުޅެމުން އަންނަނީ ރަފަހްގައި ހުރި ކޭމްޕެއްގައެވެ.

ޑރ. ކުރްދީގެ ދަރިފުޅު ގޯފަންޑުގައި ބުނީ، މިސްރުގެ ޓްރެވަލް އެޖެންސީއެއް މެދުވެރިކޮށް، ރަފަހްއިން މިސްރަށް މީހުން އެތެރެކުރަނީ 10،000 ޑޮލަރު މީހަކަށް ދައްކައިގެން ކަމަށާއި، އެ އާއިލާގައި ހިމެނޭ އޭނާގެ މަންމަ އާއި ކޮއްކޮމެންނާ އެކު މިސްރަށް އެތެރެވުމަށް 54،000 ޑޮލަރު ބޭނުންވާއިރު އެމީހުނަށް އެއްކުރެވިފައިވަނީ 517 ޑޮލަރު ކަމަށެވެ.

ޑރ.ކުރްދީގެ އާއިލާގެ އިތުރުން، ޖެނުއަރީ މަހުގެ ތެރޭގައި އައިއޭސީގެ ހަރަދުގައި ދިވެއްސަކަށް ނިސްބަތްވާ އާއިލާއެއްގެ ހަތް މެމްބަރުންވެސް ވަނީ މިސްރަށް ގެންގޮސްދީފައެވެ.