ކުރީގެ ރައީސް ޢަބްދުالله ޔާމީން ޢަބްދުލްޤައްޔޫމަށް ނިމިދިޔަ އެމްޑީޕީ ސަރުކާރުން ދިން އަނިޔާއަށް ވުރެ ބޮޑު އަނިޔާއެއް އެމަނިކުފާނުގެ އިސް ގާނޫނީ ވަކީލު އަދި ފުރަތަމަ ނާއިބު ރައީސް ޑރ. މުހައްމަދު ޖަމީލް، ވަކީލަކަށް ހުންނަވައިގެން ދެއްވާފައިވާ ކަމަށް ޕީޕީއެމްގެ ނައިބު ރައީސް އަދި ސަރުކާރުގެ މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވެއްޖެއެވެ.
ޕީޕީއެމް/ޕީއެންސީގެ ލީޑާރޝިޕްގެ ބޭފުޅުން ބައިވެރިވެވަޑައިގެން އިއްޔެ ބޭއްވެވި ޕެނަލް ޑިސްކަޝަންގައި ވާހަކަ ދައްކަވަމުން ޝިޔާމް ވިދާޅުވީ، ޖޭއެސްސީގައި އޭރުވެސް މިހާރުވެސް ތިއްބެވީ ކުރީ ސަރުކާރުން އައްޔަނު ކުރެވުނު މެންބަރުން ކަމަށެވެ. އެހެންކަމުން، މައްސަލާގައި ދަށު ކޯޓަށް ނުފޫޒް ފޯރުއްވާނެކަން އެނގިވަޑައިގަންނަވާތީ ރައީސް ޔާމިންގެ މައްސަލަ އެ ކޯޓުން ނިންމަވާތާ 72 ގަޑިއިރުތެރޭގައި ހައިކޯޓްގައި އިސްތިއުނާފް ކުރެއްވުމަށް ޖަމީލަށް ދެއްނެވި ކަމަށް ޔާމީން ވިދާޅުވި ކަމަށް ޝިޔާމް ވިދާޅުވިއެވެ.
އެނގިވަޑައިގަންނަވާނެ އެ މައްސަލަ އިސްތިއުނާފް ކުރެވުނީ ދެމަސްދުވަސް ފަހުން. އަޅުގަނޑުމެންގާތު ޖަމީލް ވިދާޅުވަމުންދިޔައީ ރައީސް ޔާމީން ވިދާޅުވެގެންނޭ މިގޮތަށް މި ކަންތައް ކުރަނީ. އަޅުގަނޑުމެންނަށް މި އެނގެނީ ވަކީލުން ގެންނަ މެސެޖު.
އަހުމަދު ޝިޔާމް
މިއާއެކު ޝިޔާމް ވިދާޅުވީ، ޑރ ޖަމީލް ޔާމީންގެ ފަރާތްޕުޅުން އޭރު ޕާޓީ ލީޑާޝިޕާއި ހަމައަށް ފޯރުކޮށްދޭ މެސެޖްތައްކަށްވެސް އިތުބާރު ނުކުރާ ހިސާބައް ކަންކަން ދިޔަ ކަމަށެވެ.
"ޑރ ޖަމީލް ބޭނުން ގޮތަކަށް މެސެޖުތައް ހުންނަނީ އަޅުގަނޑުމެންނާ ހިސާބަށް އަންނައިރު. އަޅުގަނޑަށް ހީވަނީ ރައީސް ޔާމީނަށް މިދިން އަނިޔާ. ރައީސް ޔާމީނަށް [އޭރުގެ] ސަރުކާރުން ދިން އަނިޔާއަށް ވުރެ ބޮޑު އަނިޔާއެއް ޑރ. ޖަމީލް ރައީސް ޔަމީންގެ ވަކީލަކަށް ހުންނަވައިގެން ދެއްވައިފި. އަޅުގަނޑު ހައިރާންވޭ ޑރ. ޖަމީލް އުފައްދަވައިގެން އުޅުއްވާ ޕާޓީއަށް ރައީސް ޔާމީން ވަޑައިގަތީމަ."
އަހުމަދު ޝިޔާމް
ޝިޔާމްގެ އެވާހަކަތަކަށް ތާއީދު ކުރައްވަައި ވާހަކަ ދައްކަވަމުން، ސިޓީތަކާއި އިދާރީ ދާއިރާތައް ހިންގުމާއި އާއްމު މަސައްކަތްތަކާއި ބެހޭ ވަޒީރު އާދަމް ޝަރީފް ޢުމަރު ވިދާޅުވީ، ރައީސް ޔާމީން މިނިވަންވެވަޑައިނުގެންނެވުމަކީ ހަގީގަތުގައިވެސް ކަންބޮޑުވެލައްވާ ކަމެއް ކަމަށެވެ.
"އަޅުގަނޑުމެން ހަގީގަތުގައިވެސް ކަންބޮޑުވޭ ރައީސް ޔާމީން މިނިވަން ނުވެ ހުންނާތީ. އެކަމަކު އަޅުގަނޑު ހިތަށް އަރަނީ ރައީސް ޔާމީންގެ ވަކީލުންގެ ގޮތުގައި މި ތިއްބެވި ބޭފުޅުން ތިން ހަތަރު ސަތޭކަ ޞަފްހާގެ ރިޕޯޓުތައް ހުށައަޅައިގެން ވީކަމެއް އެބައޮތްބާއޭ؟"
އާދަމް ޝަރީފް ޢުމަރު
ޝަރީފް އިތުރަށް ވިދާޅުވީ ރައީސް ޔާމީން ޖަލުގައި އޮންނެވިއިރު ބޭއްވުނު މުޒާހަރާ ތަކުގައި އޭނާ ބައިވެރިވެވަޑައިގެންނެވި ކަމަށެވެ. އަދި ޝަރީއަތް ލަސްވާތީ ކޯޓް ތަކަށް ގޮސް މަޖިީހަށް ކުއްލި މައްސަލަތައްވެސް ހުށަހެޅުއްވި ކަމަށް ވިދާޅުވިއެވެ.
"އަޅުގަނޑަކީ ރައީސް ޔާމީންގެ ޝަރީއަތުގެ ކޮންމެ އަޑުއެހުމަކަށް ދިޔަ މީހެއް. އަޅުގަނޑަށް ފާހަގަވެގެން ދިޔައީ، ރައީސް ޔާމީނަށް ލުޔެއް ލިބުނީއްޔާ ލިބިވަޑައިގަތީ ރައީސް ޔަމީން ކޮޅަށް ތެދުވެ ދެއްކެވި ވާހަކައަކުން. އަޅުގަނޑުމެންނަކަށް ޤާނޫނީ ވަކީލުންގެ ވާހަކައަކުން އެއްވެސް ކުރިއެރުމެއް ފެންނާކަށް ނެތް. "
އާދަމް ޝަރީފް ޢުމަރު
މީގެ އިތުރުންވެސް އިއްޔެގެ ޕެނަލް ޑިސްކަޝަންގައި ތިއްބެވި ބޭފުޅުން ވަނީ ޔާމީންގެ އަރިހުގައި މިހާރު ތިއްބެވީ އެމަނިކުފާނަށް އިޚްލާސްތެރި ބައެއް ނޫންކަމަށް ވަރަށް ބޮޑަށް ފާޑުވިދާޅުވެފައެވެ.
Advertisement
This content is created and paid for by advertisers and does not involve Voice Journalists
