ރައްޔިތުންގެ މަޖިލިސް އިންތިޚާބުގައި ވާދަކުރައްވާ ކެނޑިޑޭޓުންނާއި ޕާޓީތަކާ ގުޅޭގޮތުން ދޮގު ވާހަކަ ފެތުރުމުން އެންމެހާ ފަރާތްތަކުން ދުރުހެލިވުމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް)އިން އިލްތިމާސްކޮށްފިއެވެ.

އެޗްއާރްސީއެމުން އިއްޔެ ޢާންމުކުރި ނޫސްބަޔާނުގައި ބުނެފައި ވަނީ އިންތިޚާބުތަކުގައި ތާޢީދު ހޯދުމަށް މަސައްކަތް ކުރުމަކީ އިންތިޚާބަށް ކުރިމަތިލާ ކޮންމެ ކެނޑިޓޭޓަކަށްވެސް ޤާނޫނު އަސާސީއިން ލިއްބައިދޭ އިންތިޚާބީ ޙައްޤެއް ކަމަށެވެ. އަދި ކޮންމެ ރައްޔިތަކުމެ އިޚްތިޔާރުކުރާ ކެނޑިޑޭޓަކަށް ތާޢީދުކޮށް ސިޔާސީ ޙަރަކާތްތަކުގައި ބައިވެރިވުމަކީ ޤާނޫނު އަސާސީއިން ކޮންމެ ރައްޔިތަކަށްވެސް ލިއްބައިދޭ އަސާސީ ޙައްޤެއްކަމަށެވެ.

އަންނަ ހަފްތާގެ އާދިއްތަ ދުވަހު ބާއްވަނަ ހަމަޖެހިފައިވާ މަޖިލިސް އިންތިޚާބުގައި ވާދަކުރައްވާ ކެނޑިޑޭޓުންގެ ތެރެއިން ވަކި ކެންޑިޑޭޓަކަށް ތާޢީދު ހޯދުމަށް ވޯޓަށް ނުފޫޒުފޯރުވުމަށް ކުރާ އެކިކަހަލަ ޢަމަލުތައް މީޑިޔާތަކުންނާއި މީސްމީޑިޔާއިން ލިބެމުންދާތީ އެޗްއާރްސީއިން ވަނީ ކަންބޮޑުވުން ފާޅުކޮށްފައެވެ. އަދި ވަޒީފާގެ ބިރުދެއްކުން ފަދަ ޢަމަލުތައް ކޮށް ވޯޓަށް ނުފޫޒު ފޯރުވުން ހުއްޓާލުމަށް އެޗްއާރްސީއެމް އިން ވަނީ ބުނެފައިއެވެ.

Advertisement

ހަމަ އެއާއެކު، ކެނޑިޑޭޓުންނާ ގުޅޭގޮތުންނާއި ސިޔާސީ ޕާޓީތަކާ ގުޅޭގޮތުން ޙަޤީގަތާ ޚިލާފު ދޮގުވާހަކަތައް، ފަތުރަމުންދާކަމަށާޢި ރިޝްވަތު ދިނުމާއި، ވޯޓު ގަނެ ވިއްކުމާއި، ކެމްޕޭނު ހަރަކާތްތަކަށް ހުރަސްއެޅުންފަދަ ކަންކަމުގެ މައުލޫމާތު ލިބެމުން ދާތީ، އެއްވެސް ކެނޑިޑޭޓެއްގެ އިންތިޚާބީ ޙައްޤަށް ނުވަތަ އެއްވެސް ފަރުދެއްގެ ވޯޓު ދިނުމުގެ ޙައްޤަށް އުނިކަމެއް އަތުވެދާނެ ކަންކަމާ ދުރުހެލިވުމަށް އެޗްއާރުސީއެމް އިން ވަނީ އިއްޔެ ނެރުނު ބަޔާނުގައި އިލްތިމާޒުކުރައްވާފައެވެ.

މީގެ އިތުރުން އެޗްއާރްސީއެމް އިން ވަނީ ރައްޔިތުންގެ މަޖިލީހުގެ އިންތިޚާބަށް ދުވަސް ކުޑަތަންވެފައިވާ ހިނދުގައި ރިވެތި އަޚްލާޤާއި އުސޫލުތައް މަތީ ދެމިތިބެ، މިނިވަން، އިންސާފުވެރި އިންތިޚާބަކަށް ހެދުމަށްޓަކާ އެއްބާރުލުން ދިނުމަށް އެދިލައްވާފައެވެ.