މ. މުލީގެ ބައެއްގެ ގޮތުގައި އެ ރަށާ ޖެހިގެން އޮންނަ ބޯހުރާ ކަނޑައަޅުއްވައިފި އެވެ.
ރައީސް ޑރ. މުޙައްމަދު މުޢިއްޒު މިފަދައިން ކަނޑައަޅުއްވާފައި ވަނީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނުގެ ދިވެހި ރާއްޖޭގައި މީހުން ދިރިއުޅޭ ރަށްތައް ކަނޑައެޅުމުގެ ޤަރާރަށް 2014 ވަނަ އަހަރުގެ އޮކްޓޯބަރު މަހުގެ 14 ވަނަ ދުވަހު ގެނައި އިސްލާހުގެ ދަށުން އެމަނިކުފާނަށް ލިބިދޭ ބާރުގެ ދަށުންނެވެ.
ބޯހުރާއަކީ ފަތުރުވެރިކަމާ ބެހޭ ވުޒާރާގެ ދަށުގައި އޮތް 37 ހެކްޓަރުގެ ރަށެކެވެ. އެރަށް ރިސޯޓެއްގެ ގޮތުގައި ތަރައްޤީކުރުމަށް ނިންމާފައި އޮތް ނަމަވެސް ކުރީގެ ސަރުކާރުން، ރިސޯޓު ތަރައްޤީކުރާ ރަށްރަށުގެ ލިސްޓުން ބޯހުރާ ވަނީ އުނިކޮށްފައެވެ.
ރައީސް ޑރ. މުޙައްމަދު މުޢިއްޒު ގެންދަވަނީ ބައެއް ފަޅު ރަށްތަކާއި ފަޅުތައް މީހުން އާބާދުވެފައިވާ އެހެން ރަށްރަށުގެ ބައެއްގެ ގޮތުގައި ކަނޑައަޅުއްވަމުންނެވެ.
އެގޮތުން ދާދި ފަހުން އަރިއަތޮޅު ދެކުނުބުރީ މަހިބަދޫގެ ބައެއްގެ ގޮތުގައި އެ އަތޮޅު މާފަރުފަޅު ހަމަޖައްސާފައިވާއިރު، އއ. ބޮޑުފޮޅުދޫގެ ބައެއްގެ ގޮތުގައި އއ. ވެލިދުއްގައި ވަނީ ހަމަޖައްސަވާފައެވެ. އަދި ނ. މާފަރުގެ ބައެއްގެ ގޮތުގައި ނ. ފަރުމުއްޔާއި ކަނޑިންމާހުރާ ހަމަޖައްސަވާފައިވާއިރު، ހއ. ތުރާކުނުގެ ބައެއްގެ ގޮތުގައި ވަނގާރު އަދި އުކުޅަހުގެ ބައެއްގެ ގޮތުގައި އއ. ގަލަގިލި ފަޅު ވަނީ ހަމަޖައްސަވާފައެވެ.
Advertisement
This content is created and paid for by advertisers and does not involve Voice Journalists
