ޢިރާޤުގައި ބާރުގަދަ ގޮވުމެއް ގޮވާފައިވާކަމަށް ޢިރާޤުގެ ރަސްމީ ސަލާމަތީ ބާރެއް ކަމަށްވާ ޕޮޕިއުލާ މޮބިލައިޒޭޝަން ފޯސަސް (އެމްޕީއެފް) އިން ބުނެފިއެވެ.

އެމްޕީއެފް އިން ބުނިގޮތުގައި މި ގޮވުން ގޮވާފައި ވަނީ ޢިރާޤުގެ ވެރިރަށް ބަޣްދާދުގެ ދެކުނުން ގާތްގަނޑަކަށް 50 ކިލޯމީޓަރު ދުރުގައި އޮންނަ ކަލްސޯ އަސްކަރީ މަރުކަޒުގައި ހުންނަ ކޮމާންޑް ޕޯސްޓެއްގައި ރޭ ދަންވަރެވެ. އެމްޕީއެފް އިން ހާމަ ކުރެއްވި ގޮތުގައި މި ގޮވުމަކީ ވައިގެ ހަމަލާއެއްގެ ނަތީޖާއެވެ.

ނަމަވެސް ޢިރާޤުގެ އަސްކަރިއްޔާއިން މައުލޫމާތުދެއްވި ގޮތުގައި ގޮވުމުގެ ކުރިން ނުވަތަ ގޮވުމުގެ ތެރޭގައިވެސް ބާބިލް ސަރަހައްދުގެ ވައިގެ ސަރަހައްދުން އެއްވެސް ޑްރޯނެއް ނުވަތަ ފަޔަރ ޖެޓް ފެނިފައެއް ނުވެއެވެ.

Advertisement

މި ހަމަލާގައި ޕީއެމްއެފްގެ ހަނގުރާމަވެރިޔަކު މަރުވެ 8 މީހަކު ވަނީ ޒަޚަމްވެފައި ކަމަށް އަސްކަރީ މަރުކަޒު ކައިރީގައި އޮންނަ އަވަށެއް ކަމަށްވާ ހިއްލާ ސިޓީގެ ހޮސްޕިޓަލަކާ ހަވާލާދީ ނޫސްތަކުން ރިޕޯޓުކުރެއެވެ.

މި ހަމަލާ ދިނީ ކޮން ޤައުމަކުން ކަމެއް އަދި ސާފު ނުވި ނަމަވެސް ޢިރާޤުގެ ރެސިސްޓެންސް ފޯސަސް އިން މިއީ އިސްރާއީލުން ދިން ހަމަލާއެއް ކަމަށް ބުނެ ރައްދުގައި އިސްރާއީލުގެ އައިލާތު ސިޓީއަށް ޑްރޯން ހަމަލާއެއް ދީފައިވާ ކަމަށް މައުލޫމާތު ލިބެއެވެ.

މިއީ އެމެރިކާއިން ދިން ހަމަލާއެއްކަމަށް ގިނަ ފަރާތްތަކަކުން ތުޙުމަތުކޮށްފައިވީ ނަމަވެސް އެމެރިކާ އިން ވަނީ މި ތުޙުމަތުތައް ދޮގުކޮށްފައެވެ.

ޙަމަލާއާ ގުޅިގެން ޢިރާޤުގެ ސަރުކާރުން ބުނެފައިވަނީ މި ގޮވުމުގެ ފަހަތުގައި އޮތީ ކޮންބައެއްކަން ނުވަތަ ކޮންކަމެއްކަން ދެނެގަތުމަށް ތަޙްޤީގު ކުރަމުން ދާކަމަށެވެ.