ސޫރިޔާގެ އިރުއުތުރުގައި ހުންނަ އެމެރިކާ ސިފައިންގެ އަސްކަރީ މަރުކަޒަކަށް ޢިރާޤުން ވަރުގަދަ ރޮކެޓް ޙަމަލާތަކެއް ދީފިއެވެ.

މައުލޫމާތު ލިބޭ ގޮތުގައި ސޫރިޔާގައި ތިބި އެމެރިކާ ސިފައިންނަށް އަމާޒުކޮށް މި ޙަމަލާ ދީފައި ވަނީ، ޢިރާޤުގެ ޛިމާރީގައި ހަރަކާތްތެރިވާ ހަތިޔާރު އެޅި ޖަމާޢަތެއް ކަމަށްވާ ކަތާއިބު ޙިޒްބުﷲ އިންނެވެ. މި ޙަމަލާ ދޭން ޛިމާރީން ފަސް ރޮކެޓް އުދުއްސައިލާފައިވެއެވެ.

ޢިރާޤުގައި ހަރަކާތްތެރިވާ ހަތިޔާރު އެޅި ޖަމާޢަތްތަކުން އެމެރިކާ ސިފައިންނަށް ޙަމަލާ ދީފައި ވަނީ ޢިރާޤުގެ ބޮޑުވަޒީރު މުޙައްމަދު ޝިޔާޢު އަލް-ސުދާނީ، އެމެރިކާގެ ރައީސް ޖޯ ބައިޑަނާ ބައްދަލު ކުރެއްވުމަށް، އެމެރިކާގެ ވެރިރަށް ވޮޝިންގޓަނަށް ކުރެއްވި ދަތުރުފުޅެއް ނިންމަވައިލެއްވުމަށް ފަހު އެނބުރި ވަޑައިގެންނެވުމާ ދިމާކޮށެވެ.

މި ޙަމަލާއާ ގުޅިގެން ކަތާއިބު ޙިޒްބުﷲ ޖަމާޢަތުން ބުނެފައި ވަނީ މިއީ ޙަމަލާތަކުގެ ފެށުން ކަމަށާއި ޢިރާޤުގެ އިތުރުން މެދުއިރުމަތީގެ އެހެން ޤައުމުތަކުގައި ގާއިމުވެ ތިބި އެމެރިކާގެ އިސްތިޢުމާރީ ސިފައިންނަށްވެސް ޙަމަލާދޭން އަލުން ފެށުމަށް ނިންމާފައިވާ ކަމަށެވެ.

ކަތާއިބު ޙިޒްބުاللهން ބޭނުން ކޮށްފައިވާ ހަތިޔާރުތައް ސިފައިންގެ ބެލުމުގެ ދަށަށް މިހާރު ގެންގޮސްފައިވާ ކަމަށާ މި ހަމަލާތައް ތަޙްޤީގުކުރަމުން ދާކަމަށް ޢިރާޤުގެ އަސްކަރިއްޔާއިން ވަނީ ބުނެފައެވެ.

މީގެ ދެދުވަސް ކުރިން އޭޕްރިލް މަހުގެ 20 ވަނަ ދުވަހު ޢިރާޤުގެ އަސްކަރީ މަރުކަޒެއްގައި ބާރުގަދަ އެއްޗެއް ގޮވައި، ޢިރާޤުގެ ސަލާމަތީ ބާރުގެ މެންބަރެއް ވަނީ ޝަހީދުވިއެވެ. މި ގޮވުމުގެ ފަހަތުގައި ވަނީ ކޮން ޤައުމެއްކަން އަދި ސާފުވެފައި ނުވިނަމަވެސް އެއީ އެމެރިކާއިން ދިން ވައިގެ ޙަމަލާއެއް ކަމަށް ގިނަ ބަޔަކު ދަނީ ތުޙުމަތު ކުރަމުންނެވެ.