ޣައްޒާއިން ފެނުނު ކަށްވަޅުތައް ތަޙުޤީގު ކުރަން އދ. އިން ގޮވާލައިފިއެވެ.

އަދ. ގެ އިންސާނީ ޙައްޤުތަކާ ބެހޭ އޮފީހުން އިއްޔެ ގޮވާލާފައިވަނީ، ޣައްޒާއިން ފެނުނު، އެތައް ބަޔަކު ވަޅުލާފައި ހުރި ބޮޑެތި ވަޅުގަނޑުތަކާބެހޭ ގޮތުން މިނިވަން ތަޙްޤީގެއް ކުރުމަށެވެ. މިދިޔަ ދެ ހަފްތާ ތެރޭގައި ޣައްޒާގެ ބޮޑު ދެ ހޮސްޕިޓަލެއް ކައިރިން ކަށްވަޅުތަކެއް ފެނިފައިވާއިރު އެ ވަޅުގަނޑުތަކުން ފެނުނު ގިނަ މީހުންނަކީ ކޮންބައެއް ކަމެއް އަދިވެސް ނުހޯދެއެވެ. 

ކަށްވަޅުތަކުން ޢުމުރުން ދުވަސްވީ އަންހެނުންނާއި ކުޑަކުދިންނާއި ޒުވާނުން ހިމެނޭ ގޮތަށް ގާތްގަނޑަކަށް 300 މީހުންގެ ހަށިގަނޑު ފެނިފައިވެ އެވެ. މި ކަށްވަޅުތައް ފެނިފައިވަނީ ޣައްޒާ ސިޓީގެ އަލް ޝިފާ ހޮސްޕިޓަލް ކައިރިންނާއި ޚާން ޔޫނިސް ގެ ނާސިރް ހޮސްޕިޓަލު ކައިރިންނެވެ. 

އަލް ޝިފާ ހޮސްޕިޓަލް ކައިރިން ކަށްވަޅުތަކެއް ފެނިފައިވަނީ ނިރުބަވެރި އިސްރާއިލު ސިފައިން އަލް ޝިފާ ހޮސްޕިޓަލުގައި ދެ ހަފްތާ ވަންދެން ހަރަކާތްރިވެފައި ނުކުމެގެން ދިޔުމުންނެވެ. މައުލޫމާތު ލިބޭ ގޮތުގައި ޝިފާ ހޮސްޕިޓަލު ކައިރިން ދެ ކަށްވަޅު ފެނިފައިވާއިރު ޖުމުލަ 30 މީހުންގެ ހަށިގަނޑު މި ދެ ވަޅުގަނޑުން ވަނީ ފެނިފައެވެ. 

އަލް ޝިފާ ހޮސްޕިޓަލުން ވަޅުގަނޑުތައް ފެނުނުތާ ދެ ހަފްތާ ފަހުން ދެކުނުގެ ސިޓީއެއް ކަމަށްވާ ޚާން ޔޫނިސްގެ ނާސިރު ހޮސްޕިޓަލްގެ ގޯތިތެރެއިން 283 މީހުންގެ ހަށިގަނޑު ހިމެނޭ ކަށްވަޅެއް ފެނިފައިވާ ކަމަށް ފަލަސްތީނުގެ ސިވިލް ޑިފެންސް އިން މިދިޔަ ހަފްތާ ބަންދުގައި ވަނީ ބުނެފައެވެ.

ފަލަސްތީނުގެ ސިވިލް ޑިފެންސްގެ ތަރުޖަމާނު މަހުމޫދު ބަސާލް ވިދާޅުވީ ޚާން ޔޫނިސް އިން ފެނުނު ބައެއް ހަށިގަނޑުތަކަކީ އަތް ކަނޑާލައި، ބޮލަށް ބަޑިޖަހާފައި ހުރި ހަށިގަނޑުތަކެއް ކަމަށެވެ.

އިސްރާއީލުގެ އަސްކަރިއްޔާއިން ވަނީ ވަޅުގަނޑުތަކުގައި މީހުން ވަޅުލިކަން ދޮގުކޮށް އިތުރު މައުލޫމާތު ދިނުމަށް ދެކޮޅު ހަދާފައެވެ.