ރާއްޖޭގެ ހުރިހާ ކޯޓުތަކަކާއި ޝަރުޢީ ދާއިރާއާ ގުޅުންހުރި ހުރިހާ އިދާރާއެއް އެއް ވިއުގައަކުން ގުޅާލައިދޭ އިންޓަގްރޭޓެޑް ކޯޓް މެނޭޖްމަންޓް ސިސްޓަމް، އައި.ސީ.އެމް.އެސް އިފްތިތާޙްކޮށްފިއެވެ.

އައިސީއެމްއެސް އިފްތިތާހު ކޮށްފައިވަނީ މީރުމާ ހޮޓެލްގައި އިއްޔެ ބޭއްވި ޚާއްސަ ރަސްމިއްޔާތެއްގައި، ދިވެހިރާއްޖޭގެ އުއްތަމަ ފަނޑިޔާރު އަޙްމަދު މުޢުތަސިމް ޢަދުދާނެވެ. 

ޑިޕާޓްމަންޓު އޮފް ޖުޑީޝަލް އެޑްމިނިސްޓްރޭޝަން، ޑީޖޭއޭ އިން ބުނީ މި އިންޓަގްރޭޓެޑް ކޯޓް މެނޭޖްމަންޓް ސިސްޓަމް، ފަރުމާކޮށްފައިވަނީ ރާއްޖޭގައި ހުންނަ އިނގިރޭސިވިލާތުގެ ހައި ކޮމިޝަނާއި ޔޫއެންޑީޕީގެ އެހީތެރިކަމާއެކުކަމަށެވެ. އެކަމަށްޓަކައި ޑީ.ޖޭ.އޭއިން ވަނީ އެ ދެ އިދާރާއަށް ޝުކުރު އަދާކޮށްފައެވެ.

Advertisement

މި ސިސްޓަމާއި ގުޅޭގޮތުން މައުލޫމާތު ދެމުން، ޑީ.ޖޭ.އޭއިން ބުނީ، މި ސިސްޓަމްގައި ހިމެނޭ ޕަބްލިކް އެކްސެސް ޕޯޓަލްތައް މެދުވެރިކޮށް، އާންމުންނަށް މައްސަލަތަކުގެ އަދާހަަމަ ބަލައި، ކޯޓުތަކުގެ އިޖުރާއަތުތައް ދެނެގަނެވި ދެފުށްފެންނަ ނިޒާމަކުން މައްސަލަތައް ކުރިއަށް ގެންދެވޭނެ ކަމަށެވެ.

އަދި ސިސްޓަމް މެދުވެރިކޮށް، ދައުވާ ފޯމު ހުށަހެޅުމާއި، ކޭސް ރަޖިސްޓްރޭޝަނާއި، ކޭސްއަށް ފަނޑިޔާރުން ހަމަޖެއްސުން، ކޭސް ޝެޑިއުލިން އަދި ކޯޓު އަމުރު ތައްޔާރުކޮށް ހުކުމް ކުރުންވެސް ކުރިޔަށް ގެންދެވޭނެކަމަށް ޑީ.ޖޭ.އޭއިން ބުންޏެވެ.