ކުރިއަށްއޮތް ހަފްތާގައި މެންޗެސްޓަރ ސިޓީ އާއި ޕީއެސްޖީ ބައްދަލުކުރާ މެޗް ބަލާލުމަށް ސިޓީގެ ކުރީގެ ކޯޗް ޕެޕް ގާޑިއޯލާ އިއްތިހާދު ސްޓޭޑިއަމަށް ޒިޔާރަތްކުރުމަށް ހަމަޖެހިއްޖެއެވެ.

އިނގިރޭސި މީޑިއާތަކުން ގާޑިއޯލާ އިއްތިހާދު ސްޓޭޑިއަމަށް ޒިޔާރަތްކުރާކަން ރިޕޯޓްކޮށްފައިވައިރު، އެކުލަބްގެ މައްޗަށް ވަނީ އުސޫލުން ބޭރުން މާލީ މުއާމަލާތްތަކެއް ހިންގިކަމަށް ކަނޑައަޅާފައެވެ. މިކަންކަން ހިނގާފައިވަނީ މެންޗެސްޓަރ ސިޓީގެ ކޯޗްކަމުގައި ގާޑިއޯލާ ހުރި އަހަރުތަކުގައެވެ. 

މިމަހުގެ 14 ވަނަ ދުވަހުގެ ރޭ މެންޗެސްޓަރ ސިޓީ އާއި ޕީއެސްޖީ ބައްދަލުކުރާ މެޗް ބަލާލުމަށް ގާޑިއޯލާ އިއްތިހާދު ސްޓޭޑިއަމަށް ޒިޔާރަތްކުރުމަށް ނިންމާފައިވާއިރު، ސިޓީގެ މައްޗަށް ދައުވާތައް ސާބިތުވި ދުވަހުވެސް ގާޑިއޯލާ ވަނީ އެ ކްލަބާއެކު ހުރިކަމަށް ބުނެފައެވެ. އެގޮތުން މި މައްސަލާގައި ސިޓީގެ މައްޗަށް ނިންމި ނިންމުން ދިފާއުކޮށް ގާޑިއޯލާ އާންމުކުރި މެސެޖެއްގައި ބުނީ، މިހާތަނަށްވެސް އަދި ކުރިއަށް އޮތްތަނުގައި ކުރިއަށްުރެ ބޮޑަށް އޭނާ ހުންނާނީ ކުލަބާއި، ވެރިންނާއި، ޗެއާމަން އާއި، ކުޅުންތެރިންނާއި، މުވައްޒަފުންނާއި، އަދި ސިޓީގެ ސަޕޯޓަރުންނާއެކުގައި ކަމަށެވެ. 

އޮޅުވާލައިގެން ހަދާފައިވާ ކޮންޓްރެކްޓްތަކެއް މެދުވެރިކޮށް 830 މިލިއަން ޕައުންޑްގެ އާމްދަނީ އިތުރުކޮށްފައިވާ ކަމަށް ޕްރިމިއާ ލީގުގެ ރިޕޯޓުގައި ބުނާ ބުނުމާ ދެކޮޅަށް އެ ކުލަބުން މިހާރު ވަނީ މައްސަލަ އިސްތިއުނާފަށް ހުށަހަޅާފައެވެ.

މެންޗެސްޓަރ ސިޓީގެ ތާރީހުގައިވެސް އެންމެ ކާމިޔާބު ކޯޗަކީ ގާޑިއޯލާއެވެ. އޭނާ ވަނީ 2016 އިން 2026 ވަނަ އަހަރުގެ މެއިމަހުގެ ނިޔަލަށް ސިޓީގެ ހެޑް ކޯޗްކަން ކޮށްދީފައެވެ. މި މުއްދަތުގެ ތެރޭގައި ގާޑިއޯލާ ވަނީ ސިޓީއަށް ޕްރިމިއާ ލީގް 6 ފަހަރު، ޗެމްޕިއަންސްލީގާއި އެނޫންވެސް މުބާރާތްތައް ކާމިޔާބުކޮށްދީފައެވެ. ގާޑިއޯލާއަކީ މިހާރުވެސް ސިޓީގެ އެމްބެސެޑަރެކެވެ.