ދިވެހި ފުލުހުންގެ ހިދުމަތުގައި އަންހެނުން މަދު ކަމަށާއި، ، ގާބިލް އަންހެން މުވައްޒަފުން ހިދުމަތަށް ބޭނުންވާ ކަމަށް ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވެއްޖެއެވެ.
"މޯލްޑިވްސް ވިމެން އިން ޕޯލިސިންގ ކޮމިޓީ"ގެ ދެވަނަ ދައުރު އިފްތިތާހު ކުރުމަށް ބޭއްވި ޖަލްސާގައި ވާހަކަފުޅުދައްކަވަމުން ކޮމިޝަނަރ އޮފް ޕޮލިސް ވަނީ މަސައްކަތުގެ މާހައުލުގައި އަންހެނުންނާއި ފިރިހެނުންނަށް ހަމަހަމަ ފުރުސަތު ލިބިފައިވާކަން ޔަގީން ކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަސައްވުރެއް ކަމަށާއި އެކަން ހަގީގަތަކަށް ހެދުމަށް ހާއްސަ މަސައްކަތްތަކެއް ކުރައްވާނެކަމަށް ވިދާޅުވެފައެވެ.
ކުރިއަށް އޮތް ފަސް އަހަރަށް ތައާރަފުކުރާ ސްޓްރެޓީޖިކް އެކްޝަން ޕްލޭންގެ ދަށުން އެކަމަށް ހާއްސަ މަސައްކަތްތަކެއް ކުރެވޭނެ ކަން ފާހަގަކުރައްވަމުން ކޮމިޝަނަރ އޮފް ޕޮލިސް ވިދާޅުވީ، ދިވެހި ފުލުހުންގެ ހިދުމަތުގައި ތިބި މުވައްޒަފުންގެ ތެރެއިން އަންހެނުން މުވައްޒަފުންގެ އަދަދު އުޅެނީ 15 އިންސައްތަައިގައި ކަމަށާއި ފުލުހުންގެ ޚިދުމަތުގައި އަންހެނުންނަށް އަދާކުރެވޭނީ ވަކި ކަހަލަ ދައުރެއްކަމަށް ޤަބޫލުކުރާ ސަޤާފަތެއް އޮންނަކަމަށެވެ. އެހެންނަމަވެސް އެކަންކަން ބަދަލުކުރުމަށް މަސައްކަތްތަކެއް ކުރެވެމުންދާކަމަށާއި، އަދި އެކަމުގެ ނަތީޖާވެސް ފެންނަމުންދާކަމަށް އެބޭފުޅާ ވަނީ ވިދާޅުވެފައެވެ.
"މާލެއާއި އަތޮޅުތެރޭގެ ޕޮލިސް ސްޓޭޝަންތަކުގައި އަންހެން އޮފިސަރުން، ވެރިންގެ ގޮތުގައި މަސައްކަތް ކުރޭ. ސީރިއަސް ބޮޑެތި މައްސަލަތައް ބަލާ ޑިޕާޓްމަންޓުތައް ލީޑުކުރުމުގައާއި ތަހުގީގުގައި އަމަލީ ގޮތުން ބައިވެރިވާ އަންހެން އޮފިސަރުން އެބަތިބި. ފޮރެންސިކް އެނަލިސްޓުންގެ ގޮތުގައި އަދި ސީން އޮފް ކްރައިމްސް އޮފިސަރުންގެ ގޮތުގައި އަންހެން އޮފިސަރުން ހަރަކާތްތެރިވޭ. ޕޮލިސް އެނަލިސްޓުންގެ ގޮތުގައި އަންހެން އޮފިސަރުން ހަރަކާތްތެރިވޭ. އަންހެނުންނާއި ކުޑަކުދިންގެ މައްސަލަތައް ތަހުގީގު ކުރާ ގިނަ އޮފިސަރުންނަކީ އަންހެން އޮފިސަރުން."
ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވިއެވެ.
ހަމައެއާއިއެކު ކޮމިޝަނަރ އޮފް ޕޮލިސް ވިދާޅުވީ، ދިވެހި ފުލުހުންގެ ޚިދުމަތަކީ އަންހެނުންނަށް ރައްކާތެރި އަދި ކުރިމަގު އޮތް މުއައްސަސާއަކަށް ހެދުމަށް މަސައްކަތްތަކެއް ކުރަމުންދާކަމަށާއި، އެގޮތުން މުއައްސަސާއަށް ގެންނަން ބޭނުންވާ ބަދަލުތައް ގެނައުމަށް ދިރާސާތައް ހަދަން ޖެހޭ އިރު، މި ދާއިރާގައި އަންހެނުންގެ ދައުރު ބޮޑުކުރުމަށް ކުރަމުންދާ މަސައްކަތުގައި ފުލުހުންގެ ލީޑަރޝިޕްގެ ފުރިހަމަ އެއްބާރުލުން ލިބޭނެކަން ޔަގީންކުރައްވާކަމަށެވެ.
Advertisement
This content is created and paid for by advertisers and does not involve Voice Journalists
