ވޯލްޑް ސެންޓްރަލް ކިޗަން (ޑަބްލިއުސީކޭ) އިން ޣައްޒާގައި އެހީ ފޯރުކޮށްދިނުމުގެ މަސައްކަތްތައް އަލުން ފެށުމަށް ހަމަޖެހިފައިވާ ކަމަށް އިއުލާނުކޮށްފިއެވެ.

މި މަހުގެ 1 ވަނަ ދުވަހު ޔަހޫދީން ޣައްޒާގައި އެހީ ފޯރުކޮށްދިނުމަށް މަސައްކަތްކުރަމުންދިޔަ އެ ޖަމިއްޔާ އަށް އަށް ދިން ހަމަލާއަށް ފަހު ޣައްޒާގެ އެހީގެ އޮޕަރޭޝަންތައް އެޖަމިއްޔާ އިން ވަނީ ހުއްޓާލާފައެވެ.

އެހެންނަމަވެސް، ޑަބްލިއުސީކޭ އިން ނެރުނު ނޫސް ބަޔާނެއްގައި ބުނީ، ޣައްޒާގެ އިންސާނީ ރައްކާތެރިކަމާއި ހާލަތު ގޯސްވި ނަމަވެސް، ހަމަ އެ ހަކަތައާއި އެކު ވީހާވެސް ގިނަ ބަޔަކަށް ކާބޯތަކެތި ފޯރުކޮށްދިނުމުގެ މަގްސަދުގައި އެ ޖަމިއްޔާގެ އެހީގެ އޮޕަރޭޝަންތައް އަލުން ޣައްޒާގައި ފަށާނެ ކަމަށެވެ.

އެޖަމިއްޔާއިން ބުނީ މިހާރުވެސް ޣައްޒާގެ ރައްޔިތުންނަށް ފޯރުކޮށްދިނުމަށްޓަކައި ގާތްގަނޑަކަށް 8 މިލިއަން ކެއުން ހިމެނޭ 276 އުޅަނދު ތައްޔާރަށް އޮތް ކަމަށާއި، މިހާރު ވެސް އެގައުމުގައި ހުރި 68 ކޮމިއުނިޓީ ކިޗަން ގެ އިތުރުން ޣައްޒާގެ އިތުރު ހިސާބު ތަކުގައި ވެސް މި ފަދަ ތަންތަން ހެދުމަށް ނިންމާފައިވާ ކަމަށެވެ.

ޣައްޒާގައި 68 ކޮމިއުނިޓީ ކިޗަން ހިންގަމުން އަންނަ މި ޖަމިއްޔާ އިން ވަނީ ފާއިތުވެ ދިޔަ 6 މަސް ދުވަސް ތެރޭގައި ކާބޯތަކެއްޗާއި ކެއްކުމަށް ބޭނުންކުރާ ސާމާނު ހިމެނޭހެން 1,700 އަށް ވުރެ ގިނަ އުޅަނދުގެ އެހީ ޣައްޒާ އަށް ފޯރުކޮށްދީފައެވެ.

ޑަބްލިއުސީކޭ ޖަމިއްޔާއަކީ ޣައްޒާއަށް އިންސާނީ އެހީ ލޯޑްކޮށްފައިވާ އުޅަނދުތައް ވެއްދުމުގައި ވަރަށް ބޮޑު ރޯލެއް އަދާ ކުރާ ޖަމިއްޔާ އަކަށް ވާއިރު، މިއީ ސައިޕްރަސްއިން ކަނޑު މަގުން ފޮނުވި އިންސާނީ އެހީތައް ޣައްޒާގެ ރައްޔިތުންނަށް ބެހުމުގައި ވެސް މައިގަނޑު ގޮތެއްގައި ހަރަކާތްތެރިވި ޖަމިއްޔާކަން ވެސް ފާހަގަކޮށްލަން ޖެހެއެވެ.