އުރުދުން އިން އިންސާނީ އެހީ ހިފައިގެން ދިޔަ ދެ ގާފިލާއަކަށް އިސްރާއީލުގެ ވަޒަންވެރިން ހަމަލާ ދީފިއެވެ.

އުރުދުންގެ ހާރިޖީ ވުޒާރާއިން ވިދާޅުވީ މިއަދު ޣައްޒާއާ ދިމާއަށް ދަތުރުކުރަމުން ދިޔަ އުރުދުންގެ އިންސާނީ އެހީގެ ދެ ކޮންވޯއީއަށް އިސްރާއީލުގެ ބައެއް ވަޒަންވެރިން ހަމަލާދީފައިވާ ކަމަށެވެ.

އަދި އަލްޖަޒީރާއިން ރިޕޯޓްކޮށްފައިވާ ގޮތުގައި ދެ ކްރޮސިންގއެއް މެދުވެރިކޮށް އިސްރާއީލުން ޣައްޒާއަށް އެހީ ގެންދިއުމުން ވަޒަންވެރިން ވަނީ އެމީހުންގެ ބައެއް މުދާ އުކާލައި ޓްރަކްތަކަށްވެސް ގެއްލުންދީފައެވެ.

ނަމަވެސް މި ދެ ކޮންވޯއީ ވެސް ދަތުރު ކުރިއަށް ގެންގޮސް ޣައްޒާއަށް ގޮސްފައިވާ ކަމަށް މިނިސްޓްރީ އިން އިތުރަށް ބުނެފައިވެ އެވެ.

ޣައްޒާގައި ނިރުބަވެރި ޔަހޫދީން ދެމުންދާ ހަމަލާތަކުގެ ސަބަބުން މިހާތަނަށް 34،568 މީހުން ޝަހީދުވެފައި ވާއިރު މީގެތެރޭގައި 14،500 އަށް ވުރެ ގިނަ ކުޑަކުދިން ހިމެނެއެވެ. އަދި ފާއިތުވެ ދިޔަ 6 މަސް ދުވަހު، އިސްރާއިލުން ވަނީ ޣައްޒާއަށް އެހީ ވެއްދުމަށް ހުރަސްއަޅާފައެވެ. މިކަމުގެ ސަބަބުން ޣައްޒާގެ ރައްޔިތުން ޙާލުގައި ޖެހި އެތައް ބަޔަކު ދަނީ ބަނޑުހައިހޫނުކަން މަތީ ޝަހީދުވަމުންނެވެ.