ބ. އަތޮޅުގައި އޮންނަ ދުސިތު ތާނީ ރިސޯޓުގެ މުވައްޒަފަކު މޫދަށް ވެއްޓި، ގެނބެނިކޮށް ދެ ފަތުރުވެރިން އޭނާ ސަލާމަތްކޮށްފިއެވެ.

މިދިޔަ މަހުގެ 28 ގައި ހިނގި މި ހާދިސާ ގައި އެ ރިސޯޓް ގައި މަސައްކަތް ކުރަމުންދިޔަ ދިވެހި މުއައްޒަފު ސަލާމަތްކޮށްދިނީ އެ ރިސޯޓަށް ހަނީމޫނަށް ގޮސް އުޅުނު ދެމަފިރިން ކަމަށްވާ ޖޯޑަން ޑަނިލް ވަން ޑައިކާއި އޭނާގެ އަންހެނުންނެވެ.

މިކަމާއި ގުޅިގެން ބ. އަތޮޅު ފުލުހުންގެ ހިދުމަތުން ވަނީ އެ ރިސޯޓަށް ގޮސް އެ ދެމަފިރިންނާ ބައްދަލުކޮށް، އަގު ވަޒަން ކުރުމުގެ ގޮތުން ހަނދާނީ ފިލައެއް އެމީހުންނަށް ދީފަ އެވެ.

ބ. އަތޮޅު ފުލުހުންގެ ހިދުމަތުން ބުނީ ޑިއުޓީގައި ހުރި މުވައްޒަފަކު ވޯޓާ ވިލާއެއްގެ ޑެކުމަތިން މޫދަށް ވެއްޓި، އޭނާ ގެނބެމުން ދަނިކޮށް ފެނުނީ މި ދެމަފިރިންނަށް ކަމަށާއި، އެ ދެމަފިރިން އޭނާ ސަލާމަތް ކުރި އިރު، ހިތާމަވެރި ހާދިސާއެއް ނުހިނގާ ސަލާމަތްވީ އެދެމަފިރިން އެވަގުތު ދެއްކި ގަދަ ހިތްވަރުން ކަމަށެވެ.

އެހެންކަމުން،ބ.އަތޮޅު ފުލުހުން ވަނީ  ދިވެހިންގެ ފަރާތުން އެ ދެމަފިރިންނަށް ޝުކުރު އަދާކޮށް، އެމީހުން އެވަގުތު ނެގި އަވަސް ފިޔަވަޅުތަކުގެ ސަބަބުން މީހެއްގެ ފުރާނަ ސަލާމަތްވީތީ ޝުކުރު އަދާކޮށްފަ އެވެ.