ޣައްޒާގެ ދެކުނުގައި އޮންނަ ރަފާހްގައި ޔަހޫދީންގެ އަނިޔާވެރިކަމުގެ ސަބަބުން ބޯހިޔާވަހިކަން ހޯދަމުންދިޔަ ޣައްޒާގެ އާއްމުން އެ ސަރަހައްދު ދޫކޮށްދިޔުމަށް ޔަހޫދީ ފައުޖުން އަންގައިފިއެވެ.

ޣައްޒާގެ 2.2 މިލިއަނަށް ވުރެ ގިނަ މީހުން ބޯހިޔާވަހިކަން ހޯދަމުން އަންނަ ރަފާހް ހުސްކުރުމަށް ޔަހޫދީން އަންގާފައިވާއިރު، މިއީ ޣައްޒާގެ އެންމެ ދެކުނު ސަރަހައްދަށް އިސްރާއީލުން ދިނުމަށް ރާވާފައިވާ ހަމަލާ އަވަސް މުސްތަގުބަލެއްގައި ދޭނެ ކަން  އަންގައިދޭކަމެއް ކަމަށް ކަމާ ބެހޭ ފަރާތްތަކުން އަންނަނީ ބުނަމުންނެވެ.

ޔަހޫދީން، ރަފާހްގައި ދިރިއުޅެމުން އަންނަ އާއްމުންނަށް އަންގާފައިވަނީ އަލްމަވާސީ އާއި ޚާން ޔޫނިސް ފަދަ "އިންސާނީ އެހީތެރިކަން ލިބެން ހުރި" ތަނަކަށް ދިޔުމަށެވެ. މިކަން އެންގުމުގެ ގޮތުން ޔަހޫދީ ފައުޖުން ވަނީ އާއްމުންނަށް މެސެޖާއި ވޮއިސް މެސެޖް ފޮނުވުމުގެ އިތުރުން ރަފާހްގައި ދިރިއުޅެމުންދާ އާއްމުން ދާންވީ ތަންތަން ދައްކައިދިނުމަށް ތީރު ތަކެއް ޖަހާފައި ހުރި ޕޯސްޓްތަކެއް ވެސް ސޯޝަލް މީޑިއާ އަށް ދޫކޮށްލާފައެވެ.

ޔަހޫދީންގެ މި އެންގުމާއި އެކު އެ ސަރަހައްދުން އާއްމުން ފައިބަން ފަށާފައިވާކަން ފާހަގަކޮށްލަން ޖެހެއެވެ.

ޔަހޫދީން މިފަދައިން އަންގާފައިވާއިރު، ޣައްޒާގައި ހިންގަމުން އަންނަ ގަތުލުއާއްމު ހުއްޓާލުމާއި ގުޅޭ ގޮތުން މިޞްރުގައި ހަމާސް އާއި އެކު މަޝްވަރާތަކެއް ދަނީ ކުރެވެމުންނެވެ. ހަމައެއާއިއެކު މި ކަމާއި ގުޅޭގޮތުން އިސްރާއީލާއިއެކު ވެސް މަޝްވަރާތައް ކުރަމުން އަންނައިރު، އެވާހަކަތައް ވަނީ ވަރަށް ނާޒުކު ފައްތަރެއްގައި ކަމަށް ކަމާ ބެހޭ ފަރާތްތަކުން އަންނަނީ ބުނަމުންނެވެ.

މި މަޝްވަރާތައް ކުރެވެމުން ދާއިރު ވެސް ހައްދުފަހަނަ އަޅާފައިވާ ޔަހޫދީން އަންނަނީ މެދު ކެނޑުމެއްނެތި ޣައްޒާގެ އާއްމުންނަށް އަމާޒުކޮށް ހަލަމާ ދެމުންނެވެ. މިގޮތުން ފާއިތުވި 24 ގަޑިއިރު ތެރޭގައި ރަފާހް އަށް ދިން ހަމަލާތަކުގައި 8 ގެއެއް ހަލާކުކޮށްލައި، 26 މީހަކު ވަނީ ޝަހީދުކޮށްލާފައެވެ. އޭގެ ތެރޭގައި 11 ކުޑަ ކުދިންނާއި 8 އަންހެނުން ވެސް ހިމެނޭ އިރު، އަދިވެސް އިމާރާތްތަކުގެ ދަށުގައި މީހުން ތާށިވެފައިވާތީ ޝަހީދުވި މީހުންގެ އަދަދު ޔަގީން ނުވާކަމަށް ޣައްޒާގެ ހެލްތު މިނިސްޓްރީންވަނީ ބުނެފައެވެ.