ހަމާސް ޖަމާއަތުން ދިން ރޮކެޓް ހަމަލާއެއްގައި ޔަހޫދީ 4 ސިފައިން މަރުވެ، އިތުރު 10 މީހަކު ޒަހަމް ވެއްޖެއެވެ.

ހަމާސް އިން މި ހަމަލާ ފޮނުވާލާފައިވަނީ ޔަހޫދީ ސިފައިން ޣައްޒާ އަށް ވެއްދުމުގެ ކުރިންވާން ޖެހޭ ތައްޔާރީތައް ކުރިއަށް ގެންދާ ކަރެމް ޝަލޮމްއާ އަވަށާއި ކައިރި ސަރަހައްދަކަށް ކަމަށްވާއިރު، އެއާއި ގުޅިގެން އެމީހުން ވަނީ އެ ބޯޑަރު ބަންދު ކޮށްފައެވެ.

މި ހަމަލާގައި މަރުވި 4 މީހުންގެ ވަނަވަރު ޔަހޫދީ ފައުޖުން ހާމަކޮށްފައިވާއިރު، އޭގެ ތެރޭގައި ހިމެނެނީ 19 އަހަރުގެ ދެ މީހުންނާއި، 18 އަހަރުގެ މީހަކާއި 21 އަހަރު މީހެކެވެ. މި ހަތަރު ޔަހޫދީ ސިފައިންނަކީ ވެސް ސްޓާފް ސާޖަންޓް ރޭންކުގެ ތިން މީހުންނެވެ.

Advertisement

މިއާއިއެކު އިތުރު 10 ސިފައިން ޒަހަމް ވެފައިވާއިރު، އޭގެ ތެރެއިން ދެ މީހެއްގެ ހާލު ސީރިއަސް ކަމަށް ނޫސްތަކުން ރިޕޯޓްކުރެއެވެ.

ޔަހޫދީ ފައުޖުން ބުނީ މިހަމަލާގައި ޣައްޒާގެ ދެކުނުގެ ރަފާހް ސަރަހައްދުން 10 އަށް ވުރެ ގިނަ ރޮކެޓް ހަމަލާ އެމީހުންނާއި އަމާޒުކޮށް ފޮނުވާލާފައިވާ ކަމަށެވެ. 

މިކަމާއިގުޅިގެން ހަމާސް ޖަމާއަތުން ބުނީ، ކެރެމް ޝަލޮމް ކައިރީގައި އޮންނަ ބޯޑަރުގައި އިސްރާއީލުގެ ސިފައިން އެއްވެ ތިބި ތަނަކަށް ރޮކެޓް ހަމަލާ ތަކެއް ފޮނުވާލާފައިވާ ކަމަށާއި، ގިނަ ރޮކެޓްތައް އަމާޒުކޮށްފައިވަނީ ކެރެމް ޝަލޮމް ބޯޑަރު ހުރަސްކުރާ ހިސާބުގައި ސިފައިން އެއްވެފައި ތިބި ސަރަހައްދަކަށް ކަމަށެވެ. 

ހަމާސް އިން ހަމަލާދީފައިވާ ސަރަހައްދަކީ ހައްދުފަހަނައަޅާފައިވާ އިސްރާއީލުން ރަފާހް އަށް އަރައިގަތުމަށްޓަކައި އެމީހުން ގެންގުޅޭ އަސްކަރީ ސާމާނު ބަލަހައްޓަމުން ދިޔަ ސަރަހައްދެކެވެ. އިސްރާއީލަށް އަންނަ ހަމަލާތައް އާއްމުކޮށް އެމީހުންގެ އަޔަން ޑޯމް އިން ހުއްޓުވި ނަމަވެސް މި ހަމަލާ ދިން އިރު އަޔަން ޑޯމް މަސައްކަތް ކޮށްފައެއް ނުވެއެވެ.

މި ހަމަލާއާއި އެކު މިހާތަނަށް މަރުވި އިސްރާއީލުގެ އަނިޔާވެރި ސިފައިންގެ އަދަދު ވަނީ 267 އަށް އަރާފައެވެ.