އެއްވެ އުޅުމުގެ ޤާނޫނަށް އިސްލާހު ގެނައުމަށް ރައްޔިތުންގެ މަޖިލީހުގެ ކުރިއަށް އޮތް 20 ވަނަ ދައުރުގައި ހުށައެޅުމަށް ސަރުކާރުން ނިންމާފައިވާ ކަމަށް ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވެއްޖެއެވެ.
އިއްޔެ ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ހީނާ ވިދާޅުވީ، އަންނަ މަޖިލިސް ފެށިގެން ދާއިރު އެއްވެ އުޅުމުގެ ޤާނޫނަށް އިސްލާހު ހުށަހެޅުމަށް ސަރުކާރުގެ ވިސްނުން އެބަހުރި ކަމަށާއި، މި ސަރުކާރުގެ އަމާޒަކީ ޤާނޫނު އަސާސީން ލިބިދޭ ހުދޫދުގެ ތެރެއިން ހުރިހާ ފަރާތްތަކަށްވެސް އެއްވެ އުޅުމުގެ ފުރުސަތު ހުޅުވާލާފައި ބޭއްވުން ކަމަށެވެ.
"ސަރުކާރުގެ ވިސްނުން އެބަހުރި އަންނަ މަޖިލީސް ފެށިގެންދާއިރު، އެ ޤާނޫނަށް އިސްލާހު ހުށަހަޅަން. ސަރުކާރުގެ އަމާޒަކީ ވީހާވެސް އެއްވެ އުޅުން ޤާނޫނު އަސާސީން ލިބިދޭ ހުދޫދުގެ ތެރެއިން ހުރިހާ ފަރާތްތަކަށްވެސް އެ ފުރުސަތު ހުޅުވާލާފައި ބޭއްވުން. އަންނަ މަޖިލީހުގައި އެއްވެ އުޅުމުގެ ޤާނޫނަށް އިސްލާހު އިރާދަ ކުރެއްވިއްޔާ ހުށަހެޅިގެންދާނެ."
ހީނާ ވިދާޅުވިއެވެ.
ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނަށް ބަދަލު ގެނެސްފައިވަނީ 2016 ވަނަ އަހަރުއެވެ. އެއާއިއެކު، މާލޭގައި އެއްވެ އުޅުމުގެ ފުރުޞަތު ވަނީ ވަރަށް ބޮޑަށް ހަނި ވެފައިވާއިރު، ފުލުހުންގެ ހުއްދައާއި ނުލައި މާލެ ސަރަހައްދު މިހާރު އެއްވެ އުޅެވޭނީ ކާނިވާ ސަރަހައްދުގައި އެކަނިކަން ފާހަގަކޮށްލަން ޖެހެއެވެ.
މިބަދަލު އުވާލުމަށް ކުރީގެ ރައީސް އިބްރާހިމް މުޙައްމަދު ޞާލިހު ވައުދުވެވަޑައިގެންއިރު، އެމަނިކުފާނު ނިސްބަތްވާ އެމްޑީޕިގެ މެޖޯރިޓީ އޮތް މި ހިނގާ 19 ވަނަ މަޖިލީހަށް އެ އިސްލާހު އުވާލުމަށް 2019 ވަނަ އަހަރު ހުށައެޅި ނަމަވެސް އެ މަސައްކަތް އަދިވެސް ކުރިއަށް ގޮސްފައެއް ނުވެއެވެ.
ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ރިޔާސީ ވައުދުފުޅުގެ ދަށުން މި އިސްލާހު މަޖިލީހަށް ހުށައެޅުމަށް ނިންމާފައިވާ ކަމަށް ރައީސްއޮފީހުން ހާމަކުރިއިރު، މީގެ ކުރިން ބޭއްވި ނޫސްވެރިންގެ ބައްދަލުވުމެއްގައި ދާޙިލީ ސަލާމާތާއި ފަންނިޔާތާއި ބެހޭ ވަޒީރު އަލީ އިހުސާން ވެސް ވަނީ މާލެ ސަރަހައްދުގައި އެއްވެ އުޅެވޭނެ އިތުރު ތަންތަން ކަނޑައެޅުމުގެ މަސައްކަތް ސަރުކާރުން ކުރަމުންދާ ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
