ކޮވިޑް 19 ގެ ބަލިމަޑުކަމާއި ދެކޮޅަށް އިންޑިއާއިން އުފެއްދި ކޮވިޝީލްޑް ޖެހުމުން ލޭގަނޑުވާ ކަމަށް އެއްބަސްވި، އެ ވެކްސިން ގެ މައި ކުންފުނި އެސްޓްރާޒެނެކާއިން ކޮވިޝީލްޑް ވެކްސިން ވިއްކުން ހުއްޓާލައިފިއެވެ. 

އިނގިރޭސިވިލާތުގެ އޮކްސްފޯޑް ޔުނިވާސިޓީއާ ގުޅިގެން ކުރިއެރުވި އަދި ސީރަމް އިންސްޓިޓިއުޓް އޮފް އިންޑިއާއިން އުފައްދާ މި ވެކްސިން ވިއްކުން ހުއްޓާލުމަށް ނިންމީ ކޮވިޑް 19 އާއި ގުޅިގެން ތައްޔާރުކޮށްފައިވާ ވެކްސިން ތައް ގިނަ ވުމާއި އެކު، ކޮވިޝީލްޑް އަށް ވުރެ ބޮޑަށް ތަރައްގީވެފައިވާ ވެކްސިން ތަކެއް މާކެޓަށް ނުކުތުމުންނެވެ.

 އެސްޓްރާޒެނެކާ އަށް ޔޫރަޕިއަން ޔޫނިއަންގައި ދީފައިވާ "މާކެޓިން އޮތޯރިޒޭޝަން" އަމިއްލަ އަށް އަނބުރާ ގެނެސްފައިވާއިރު، އެކުންފުނިން ބުނީ އެ ވެކްސިން އުފައްދައި ވިއްކުން ހުއްޓާލާފައިވާކަމަށެވެ.

 އެސްޓްރާޒެނެކާ މިފަދައިން ނިންމާފައިވާއިރު، އިނގިރޭސިވިލާތުގެ ކޯޓެއްގައި އެ ކުންފުންޏާއި ދެކޮޅަށް 100 މިލިއަން ޕައުންޑްގެ ދައުވާއެއް ކުރިއަށް އެބަ ދެއެވެ. އެގޮތުން މި ވެކްސިންގެ ސަބަބުން ކުރިމަތިވި ސިއްހީ މައްސަލަތަކަކާއި ގުޅިގެން 50 މީހުން ވަނީ ލިބުނު ގެއްލުމުގެ ބަދަލު ހޯދުމަށް ކުންފުންޏާއި ދެކޮޅަށް ދައުވާ ކޮށްފައެވެ.

އެކަމާއި ގުޅިގެން ކޯޓުގައި މި ކުންފުނިން ބުނީ މި ވެކްސިން ޖެހުމުގެ ސަބަބުން ލޭ ގަނޑުވުމާއި ލޭގައި ހުންނަންޖެހޭ ޕެލެޓްލެޓް ގެ މިންވަރު ދަށްވާ ހަލާތެއް ކަމަށްވާ ތްރޮމްބޮސިސް ވިތު ތްރޮމްބޮސައިޓޯޕެނިއާ ސިންޑްރޯމް ނުވަތަ ޓީޓީއެސް ފެނުމުގެ ފުރުސަތު ވަރަށް މަދުން ނަމަވެސް އެބައޮތް ކަމަށެވެ. އެ ކުންފުނިން ބުނީ  ޓީޓީއެސް އަކީ އެ ވެކްސިން ޖެހިޔަސް އަދި ނުޖެހިޔަސް ހަށިގަނޑުން ފެނިދާނެ ސިންޑްރޯމް އެއް ކަމަށާއި، އެ ވެކްސިނާއި ދެކޮޅަށް ކޯޓަށް ހުށައަޅާފައިވާ ކޮންމެ މައްސަލައެއްގައި ވެސް ތަޖުރިބާކާރުންގެ ހެކި ހޯދަން ޖެހޭ ކަމަށެވެ.

މި ވެކްސިންގެ ސަބަބުން ލިބުނު ގެއްލުމުގެ ބަދަލު ހޯދުމަށް ދައުވާ ކުރި އެކަކު ބުނި ގޮތުގައި ވެކްސިން ޖެހުމަށްފަހު ސިކުނޑިއަށް ދާއިމީ ގޮތުން ގެއްލުން ލިބިފައިވާ ކަމަށާއި،އެކަމުގެ ސަބަބުން އޭނާ މަސައްކަތް ކުރުމަށް ހުރަސްތަކާއި ކުރިމަތިވި ކަމަށެވެ.

އިންޑިއާ އާއި އިނގިރޭސިވިލާތް ހިމެނޭ ގޮތަށް 150 އަށް ވުރެ ގިނަ ގައުމުގައި ކޮވިޑް-19 އިން ރައްކާތެރިވުމަށް މި ވެކްސިން ދީފައިވާއިރު މީގެ ކުރިން ދުނިޔޭގެ ސިއްހަތާއި ބެހޭ ޖަމިއްޔާ (ޑަބްލިއުއެޗްއޯ) އިން ވެސް ވަނީ ކޮވިޝީލްޑުން މިފަދަ ނޭދެވޭ އަސަރުތަކެއް ކޮށްފާނެ ކަމަށް ބުނެފައެވެ.