ދިވެހިރާއްޖޭގެ ޚާރިޖީ ވަޒީރު މޫސާ ޒަމީރުއާއި އިންޑިއާގެ ޚާރިޖީ ވަޒީރު ޑރ. ސުބްރަމާނިއަމް ޖައިޝަންކަރާ ބައްދަލުކުރައްވައިފިއެވެ.

މިއަދު ޚާރިޖީ ވުޒާރާއިން ހާމަކުރެއްވި ގޮތުގައި، ވަޒީރު މޫސާ ޒަމީރު އިންޑިއާއަށް ކުރެއްވި ރަސްމީ ދަތުރުފުޅުގައި އެ ޤައުމުގެ ޚާރިޖީ ވަޒީރު، ޖައިޝަންކަރުއާއި ބައްދަލުކުރައްވާ ވަނީ ރަސްމީ މަޝްވަރާ ތަކެއް ކުރައްވާފައެވެ. އެގޮތުން މި ބައްދަލުވުމުގައި މައިގަނޑުގޮތެއްގައި މަޝްވަރާކޮށްފައިވަނީ އިންފްރާސްޓްރަކްޗަރ ޑިވެލޮޕްމަންޓާއި، ކެޕޭސިޓީ ބިލްޑިންގ ފަދަ ދާއިރާތަކުން ދެ ޤައުމުގެ އެއްބާރުލުން ފުޅާކޮށް ފުންކުރުމާ ގުޅޭ ގޮތުންނެވެ.

މި ބައްލުވުމާ ގުޅޭ ގޮތުން، ވަޒީރު ޒަމީރު އެކްސްގައި ވިދާޅުވީ ޑރ. އެސް ޖައިޝަންކަރާ ބައްދަލުވެވަޑައިގަތުމުން އުފާކުރައްވާކަމަށެވެ. އަދި އިންޑިޔާގެ ވެރިރަށް، ނިއުދިއްލީގައި ކުރިއަށް ގެންދިޔަ ބައްދަލުވުމުގައި ދެ ޤައުމުގެ ދެމެދު އޮތް، ޒަމާންވީ ގުޅުމާ ބެހޭގޮތުން ވާހަކަ ދައްކަވާ، އެ ގުޅުމުގެ ތެރެއިން ކުރެވެމުން އަންނަ މަސައްކަތްތައް އިތުރުކުރުމާއިމެދުވެސް މަޝްވަރާތައް ކުރެއްވިކަމަށް ވަޒީރު ފާހަގަކުރެއްވިއެވެ.

އިންޑިޔާގެ ޚާރިޖީ ވަޒީރު ޑރ. ޖައިޝަންކަރުވެސްވަނީ މި ބައްދަލުވުމާ ގުޅޭގޮތުން މީޑިއާތަކަށް މައުލޫމާތު ދެއްވާފައެވެ. އެގޮތުން، ރާއްޖެއާއި އިންޑިއާގެ ގުޅުން ބިނާވެގެން އަންނަނީ ދެ ޤައުމުގެވެސް މަސްލަހަތު ހިމެނޭކަންކަމުގެ މައްޗަށާއި ދެ ފަރާތުން ކޮށްދެމުންދާ ކަންކަމުގެ އިތުރުން އެއް ޤައުމުން އަނެއް ޤައުމާއިމެދު ޢަމަލުކުރަމުންދާ ގޮތުގެ މައްޗަށް ކަމަށް، ޑރ. ޖައިޝަންކަރު ވިދާޅުވިއެވެ.

ވަޒީރު މޫސާ ޒަމީރު، އިންޑިޔާއަށް ކުރެއްވި މި ދަތުރުފުޅަކީ މަޤާމާ ހަވާލުވެވަޑައިގެންނެވި ފަހުން އެމަނިކުފާނު އިންޑިއާ އަށް ކުރެއްވި ފުރަތަމަ ރަސްމީ ދަތުރުފުޅެވެ.