ޣައްޒާ އަށް އެހީ ވެއްދުމަށް ބޭނުންކުރާ މައި ބޯޑަރެއް ކަމަށްވާ ކެރެމް ޝަލޮމް އަލުން ހުލުވާލި ކަމަށް އިއްޔެ ޔަހޫދީން ބުނި ނަމަވެސް އަދިވެސް އެ ބޯޑަރު ހުރަސްކޮށް ޣައްޒާއަށް އެހީ ވެއްދިފައި ނުވާ ކަމަށް އދ އިން ބުނެފިއެވެ.

ޔަހޫދީ ފައުޖުން ކެރެމް ޝަލޮމް ބޯޑަރު ފުރަތަމަ ބަންދު ކުރީ ހަމާސް އިން އެމީހުންނަށް ހަމަލާދީ 4 ސިފައިން މަރާލުމާއި ގުޅިގެންނެވެ. އޭގެ ފަހުން އެމީހުން ރަފާހް އަށް އަރައިގަނެ ބޯޑަރުގެ ކޮންޓްރޯލް ނެގުމާއި ގުޅިގެން އެތަނުން އެހީ ވެއްދުން ވަނީ އެއްކޮށް ބަންދުވެފައެވެ. އެއާއިއެކު ޣައްޒާގައި ދިރިއުޅެމުންދާ 2.3 މިލިއަން އާއްމުންނަށް ވަނީ ބޯފެނާއި ކާނާ އާއި ސިއްހީ ތަކެތި ފަދަ އެހީތައް ލިބުމުން މަހުރޫމް ވެފައެވެ.

އދ އިން މިފަދައިން ބުނެފައިވާއިރު، ދުނިޔޭގެ ސިއްހަތާއި ބެހޭ ޖަމިއްޔާއިން ވަނީ ތިން ދުވަހުގެ ތެރޭގައި ޣައްޒާގެ ހޮސްޕިޓަލް ތަކުގައި ބޭނުންކުރާ ތެޔޮ ހުސްވާނެ ކަމަށް އިންޒާރު ވެސް ދީފައެވެ. މުޅި ދުނިޔެއިން އިންޒާރު ދެމުންދަނިކޮށް ޔަހޫދީން ރަފާހް އަށް އަރައިގަތުމަކީ ޣައްޒާ ގައި ކުރިއަށްދާ އެހީގެ އޮޕަރޭޝަން ތަކާއި މިހާރު ފޯރުކޮށްދެމުން އަންނަ އިންސާނީ އެހީ އެއްކޮށް ހުއްޓޭނެ ކަމެއް ކަމަށް ކަމާ ބެހޭ ފަރާތްތަކުން ވަނީ ބުނެފައެވެ.

ޔަހޫދީން ރަފާހް އަށް އެރުމާއި އެކު އެމެރިކާއިން ހައްދުފަހަނަ އަޅާފައިވާ އިސްރާއީލަށް ހަތިޔާރު ފޯރުކޮށްދިނުން މެދުކަނޑާލާނެ ކަމުގެ އިންޒާރުދީފައިވާއިރު، ގަތަރާއި މިޞްރުން އަދިވެސް އަންނަނީ ހަނގުރާމަ ހުއްޓާލުމަށް ދެ ފަރާތުން އެއްބަސްވުމަކަށް ގެނައުމުގެ މަސައްކަތްތައް ކުރަމުންނެވެ.