ރާއްޖޭގައި ޤާއިމުވެ ތިބި އިންޑިއާ ސިފައިންގެ ފަހު ބެޗު އަނބުރާ ފޮނުވާލައިފިއެވެ.

އިންޑިއާގެ ޚާރިޖީ ވުޒާރާގެ ތަރުޖަމާނާ ހަވާލާދީ އިންޑިއާގެ ނޫސްތަކުން ރިޕޯޓްކޮށްފައިވާ ގޮތުގައި ރާއްޖޭގައި ތިބި ހުރިހާ އިންޑިއާ ސިފައިން އަނބުރާ ގެންދިއުމަށްފަހު މިހާރު ސިފައިންގެ ބަދަލުގައި ޓެކްނިކަލް މަދަނީ މީހުން ވަނީ ގެނެސްފައެވެ.

އިންޑިއާގެ ސިފައިން ރާއްޖޭގައި ހަރަކާތްތެރިވަމުން އައީ އެ ޤައުމުން ހަދިޔާކޮށްފައިވާ ދެ ހެލިކަޕްޓަރާއި ޑޮނިއާއެއް ދުއްވައި، މެއިންޓަނަންސްގެ ކަންކަން ބެލެހެއްޓުމަށެވެ.  

Advertisement

ރާއްޖޭގައި ތިބި އިންޑިއާ ސިފައިން ފޮނުވާލުމަކީ ރައީސް ޑރ.މުޙައްމަދު މުޢިއްޒުގެ އެންމެ ބޮޑު އެއް ވަޢުދެވެ. ރާއްޖޭގައި އެއްވެސް ޤައުމެއްގެ ސިފައިންނަށް ޤާއިމުވެ ނުތިބެވޭނެ ކަމަށާއި ރާއްޖޭގައި ޤާއިމުވެތިބި އިންޑިއާ ސިފައިން އަނބުރާ ފޮނުވާލައްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވައުދުވެވަޑައިގަންނަވާ، ވެރިކަމާ ހަވާލުވެވަޑައިގަތުމާއެކު އެމަނިކުފާނު ވަނީ އިންޑިއާ ސަރުކާރާ ގުޅިގެން އެ މަސައްކަތް ފައްޓަވާފައެވެ.

އެގޮތުންރާއްޖޭގައި ޤާއިމުވެ ތިބި ހުރިހާ ސިފައިން މޭ 10 ގެ ކުރިން ފޮނުވާލުމަށް ދެ ޤައުމުގެ ދެމެދުގައި ވަނީ އެއްބަސްވެފައެވެ. ރާއްޖޭގެ ތިން ސަރަހައްދެއްގައި އިންޑިއާ ސިފައިން ޤާއިމުވެ ތިބިއިރު މާރިޗު މަހު އެއް ޕްލެޓްފޯމު އަދި، އޭޕްރިލް މަހު އަނެއް ޕްލެޓްފޯމުގައި ތިބި ސިފައިން ވަނީ ފޮނުވާލާފައެވެ. އަދި މިއަދު ތިންވަނަ ޕްލެޓްފޯމުގައި ތިބި ސިފައިން ފޮނުވާލުމާއެކު، ރައީސްގެ ވަޢުދުފުޅާ އެއްގޮތަށް، ރާއްޖޭގައި ޤާއިމުވެ ތިބި ހުރިހާ އިންޑިއާ ސިފައިން ވަނީ އަނބުރާ ފޮނުވާލެވިފައެވެ.