ދީނާއި ޤައުމު ދެކެ ލޯބިވާ ހަރުދަނާ ޖީލެއް ބިނާކުރަން އަޒުމު އާ ކުރަންޖެހޭކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛު ހުސައިން މުޙައްމަދު ލަޠީފް ވިދާޅުވެއްޖެއެވެ.
ނައިބު ރައީސް މިފަދައިން ވިދާޅުވީ ބައިނަލްއަގުވާމީ ކުޑަކުދިންގެ ދުވަހުގެ މުނާސަބަތުގައި އެމަނިކުފާނު އެކްސް ގައި ކުރެއްވި ޕޯސްޓެއްގައެވެ.
މިގޮތުން ނައިބު ރައީސް ގެ މި ޕޯސްޓްގައި ކުޑަކުދިންގެ ދުވަހުގެ ހެޔޮއެދުމާއި ތަހުނިޔާ އެންމެހާ ލޮބުވެތި ކުޑަކުދިންނަށް އަރިސްކުރައްވަމުން އެމަނިކުފާނު ވިދާޅުވީ، ދުގެ ކުޑަކުދިންނަކީ މާދަމާ ޤައުމުގެ ހުންގާނުގައި ހިފާނެ ދަރީންނަށްވީއިރު، މިފަދަ ދުވަހެއްގައި ދީނާ ޤައުމު ދެކެ ލޯބިވާ ހަރުދަނާ ޖީލެއް ބިނާކުރުމަށް އަޒުމު އާ ކުރަން ޖެހޭ ކަމަށެވެ.
ނައިބު ރައީސް ގެ އިތުރުން ވެސް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ކުޑަކުދިންގެ ދުވަހުގައި ދެއްވި ޚިޠާބުގައި އެމަނިކުފާނު ވެސް ވަނީ ދިވެހި ލޮބުވެތި ކުޑަކުދީން ބޮޑެތި ކުރާންވާނީ، އިސްލާމީ އުޞޫލުތަކަށް ކަމޭހިތައި، ދިވެހިވަންތަކަމަށް ލޯބިކުރާ، ޤައުމު އިސްކުރާ، ގޮތްހުރި އުޅުންހުރި ޖީލެއްގެ ގޮތުގައި ކަމަށާއި އެއީ އެންމެންގެ ޒިންމާއެއް ކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
