ގައުމީ ޔުނިވަސިޓީގެ މެޑިކަލް ސްކޫލާއި ޓީޗީންގ ހޮސްޕިޓަލް އިމާރާތް ކޮށްދޭނެ ބަޔަކު ހޯދަން އިއުލާނުކޮށްފިއެވެ.

ޤައުމީ ޔުނިވަސިޓީން ކުރި އިޢުލާން ގައި މެޑިކަލް ސްކޫލާއި ޓީޗީން ހޮސްޕިޓަލްގެ އިތުރުން ފެކަލްޓީ އޮފް ހެލްތް ސައިންސް އާއި ސްކޫލް އޮފް ނާސިންގެ ހުޅުމާލޭގައި އިމާރާތްކޮށްދޭން ޝައުގުވެރިވާ ފަރާތްތަކުން މިއަންނަ ޖޫންގެ ކުރިން ޕްރޮޕޯސަލް ހުށަހެޅުމަށް ހުޅުވާލާފައެވެ. 

ޕާކިސްތާނުގެ ހިލޭ އެހީގެ ދަށުން ކުރިއަށްގެންދާ މި މަޝްރޫއުތަކުގެ ތެރެއިން މެޑިކަލް ސްކޫލާއި ޓީޗީން ހޮސްޕިޓަލް އެޅުމަށް ހަމަޖެހިފައި ވަނީ ޔުނިވަސިޓީން ދޭ ޑިޒައިނާ އެއްގޮތަށެވެ. އަދި ސްކޫލް އޮފް ނާސިން އާއި އެކަމަޑޭޝަން ބްލޮކްގެ މަސައްކަތް ކޮށްދޭނެ ބަޔަކު ހޯދުމަށް އިއުލާންކޮށްފައި ވަނީ ޑިޒައިންނާއި ބިލްޑް އުސޫލުގެ ދަށުންނެވެ.

މި ދެ މަޝްރޫއުގެ މަސައްކަތަށް ޝައުގުވެރިވާ ފަރާތްތަކަށް އަންނަ ޖޫން މަހު 24 ވަނަ ދުވަހުގެ ނިޔަލަށް ޕްރޮޕޯސަލް ހުށަހެޅުމުގެ ފުރުސަތު ވަނީ ހުޅުވާލައިފައެވެ.

އެމްއެންޔޫއިން ބުނެފައިވާ ގޮތުން، މެޑިކަލް ސްކޫލް ޤާއިމުކުރާނީ އެއްފަހަރާ 100 ދަރިވަރުންނަށް ކިޔަވައިދެވޭނެ ޒަމާނީ ވަޞީލަތްތަކާއެކުއެވެ. އަދި ޓީޗިންގ ހޮސްޕިޓަލް ތަރައްޤީ ކުރަނީ 300 އެނދުގެ ހޮސްޕިޓަލެއްގޮތަށް، ބަލި މީހުންނަށް ޚިދުމަތް ދެވޭ ފެންވަރަށް ޒަމާނީ ޓެކްނޮލޮޖީއާއެކުކަމަށެވެ. މި ދެ ތަންވެސް ޢިމާރާތްކުރުމަށް ހަމަޖެހިފައިވަނީ ހުޅުމާލޭގައެވެ. އަދި މި 2 ތަނަށް 5700 އަކަ މީޓަރުގެ ސަރަޙައްދެއް ހުޅުމާލެއިން ހަމަޖެހިފައިވާކަމަށް ޤައުމީ ޔުނިވަރސިޓީން ބުންޏެވެ.

މީގެ އިތުރުން މެޑިކަލް ސްކޫލާއި ޓީޗިންގ ހޮސްޕިޓަލް ފަރުމާކޮށްފައި ވަނީ ޕާކިސްތާނުގެ އާތިފު ނަޒަރު ޕްރައިވެޓް ލިމިޓެޑުން ކަމަށާ، އެތަން އިމާރާތް ކުރަނީ މެޑިކަލް ޓޫރިޒަމަށްވެސް މަގުފަހިވާގޮތަށް ކަމަށް އެމްއެންޔޫއިން ބުނެފައިވެއެވެ. އަދު މި ސްކޫލާއި ހޮސްޕިޓަލުގައި ކިޔަވާ ދަރިވަރުންނަށް ޚާއްޞަ އެކޮމޮޑޭޝަން ބްލޮކެއް ވަކިން ހުންނާނެ ކަމަށް ބުނެފައިވެއެވެ.

އޭގެ އިތުރުން، ހުޅުމާލޭގެ 69912.28 އަކަ މީޓަރުގެ ސަރަހައްދެއްގައި އެޅުމަށް ހަމަޖެހިފައިވާ އިމާރާތެއްގައި ފެކަލްޓީ އޮފް ހެލްތް ސައިންސް އާއި ސްކޫލް އޮފް ނާސިންއަށް ވަކިވަކިން އިމާރާތް ކުރުމަށް ހަމަޖެހިފައިވާ ކަމަށާއި އެ ތަނުގައި އެކަމަޑޭޝަން ބްލޮކްއާއި ކުޅިވަރު ކުޅުމަށް ޚާއްސަ ސަރަޙައްދަކާއި ކޮންފަރެންސް ހޯލްފަދަ ދަރިވަރުންނަށް މުހިއްމު ތަންތަން އިމާރާތް ކުރުމަށް ހަމަޖެހިފައިވާ ކަމަށް ޔުނިވަސިޓީން ބުނެފައިވެއެވެ.

މެޑިކަލް ސްކޫލާއި ޓީޗީންގ ހޮސްޕިޓަލްގެ ބިންގާ މި އަހަރުގެ ތެރޭ އަޅާ، ކުރިއަށް އޮތް 2 އަހަރާއި ބައިގެ ތެރޭގައި މަސައްކަތް ނިންމާ ދަރިވަރުންނަށް އެތަނުން ކިޔެވުމުގެ ފުރުޞަތު ފަހިވެގެން ދާނެކަމަށް އެމްއެންޔޫއިން ވަނީ ބުނެފައެވެ. 

އެމްއެންޔޫގެ މެޑިކަލް ސްކޫލުގައި މިހާރު 300 އާ ގާތްކުރާ އަދަދަކަށް ދަރިވަރުން އަންނަނީ ކިޔަވަމުންނެވެ.