ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާގެ ޓީމުން ނިމިދިޔަ ހަފްތާގައި ފެށި އޮޕަރޭޝަން ކުރަނގި އިން އެއްކުރެވޭ މައުލޫމާތާއި އެކު، ރަށް ރަށަށް އަރާ ބިދޭސީ މީހާގެ ފޮޓޯއެއް ނަގާލުމުން އޭނާއާއި ބެހޭ ހުރިހާ މައުލޫމާތެއް އެ ރަށެއްގެ ކައުންސިލަށް އެނގިގެން ދިޔުމަކީ އަމާޒު ކަމަށް އެ ވުޒާރާގެ ވަޒީރު ޢަލީ އިހްސާން ވިދާޅުވެއްޖެއެވެ.
ރާއްޖޭގައި އުޅޭ ހުރިހާ ބިދޭސީންގެ ފޮޓޯ އާއި އިނގިލީގެ ނިޝާން ނަގަން ފަށައި، ގަވައިދާ ހިލާފަށް އުޅޭ ބިދޭސީން ގަވާއިދަށް ފެއްތުމަށް އޮޕަރޭޝަން "ކުރަނގި"ގެ ފަށައި ރާއްޖޭގައި ދިރިއުޅޭ ބިދޭސީންގެ ބަޔޮމެޓްރިކް ޑާޓާ އެއްކުރުމުގެ މަސައްކަތް ދާޚިލީ ސަލާމަތާއި ފަންނިއްޔާތާއި ބެހޭ ވުޒާރާއިން އަންނަނީ ކުރަމުންނެވެ.
އެކަމާއި ގުޅޭގޮތުން އިތުރު މައުލޫމާތު ދެއްވަމުން، ހޯމް ޓީމް އިން މިއަދު ބޭއްވި ނޫސްވެރިންގެ ބައްދަލުވުމުގައި ވަޒީރު އިހްސާން ވިދާޅުވީ، އޮޕަރޭޝަން “ކުރަނގި” ގެ ދަށުން އެއްކުރެވޭ ބަޔޮމެޓްރިކް ޑާޓާގެ އެކްސެސް މިވަގުތު އޮންނާނީ ފުލުހުންނާއި، އިމިގްރޭޝަން އަދި ހޯމްލޭންޑް އެންޑް ސެކިޔުރިޓީ މިނިސްޓަރީއަށް ކަމަށެވެ.
އެހެން ނަމަވެސް ކުރިއަށް އޮތް ތަނުގައި ރަށްރަށަށް އަރާ ބިދޭސީން ދެނެގަތުމަށްޓަކައި ރަށްރަށުގެ ކައުންސިލް ތަކަށް ލިމިޓެޑް އެކްސެސް ދެއްވާނެ ކަމަށް އިހްސާން ވިދާޅުވިއެވެ.
މިހާރު މި ސޮފްޓްވެއަރ ޑިވެލޮޕް ކުރެވެމުން މިދަނީ، ކުރިއަށް އޮތް ތަނުގައި އަޅުގަނޑުމެންގެ އަމާޒަކީ، ފޯނުގެ ޒަރީޢާއިން ބިދަެސީއެއްގެ ފޮޓޯ ނަގާލީމާ، އެމީހާއާ ބެހޭ މައުލޫމާތު އެ އިދާރާތަކަށް ލިބުން. މިހާރު މި ކުރެވޭ މަސައްކަތުގެ އެންޑް ރިޒަލްޓަކަށް ވާނީ އެވަރަށް ކައުންސިލްތަކާ ފުލުހުން އެމްޕަވަރ ކުރުން. މާނައަކީ ރަށއރަށުގައި ކައުންސިލަރަކު، ދޯންޏެއް އައިސް ރަށަށް ކައިރި ކޮށްލީމާ އޭގެން ފައިބާ ބިދޭސީން، އޭނާގެ ފޮޓޯއެއް ނަގާލީމާ، ސިސްޓަމުން ގާތްގަނޑަކަށް ތިރީހަކަށް ސުކުންތު ތެރޭގައި ރެސްޕޮންސް ލިބޭނެއޭ އެންމެ ލަސްވެގެންވެސް، އެއީ ކާކުތޯ، ކޮން ކުންފުންޏެއްގެ ދަށުން ރާއްޖެ އެތެރެވި މީހެއްތޯ، މިހާރު އޭނާ ހުރީ ގަވާއިދާ އެއްގޮތަށްތޯ، ގަވާއިދާ ޚިލާފަށްތޯ
ވަޒީރު ޢަލީ އިހްސާން
އެ މައުލޫމާތުތައް ލިބުމުން އެ ބިދޭސީ މީހާގެ މައްސަލަ ރިޕޯޓް ކުރަންޖެހޭ ނަމަ އެކަން ކައުންސިލަށް އެނގޭނެ ކަމަށާ، ކުރިއަށް އޮތް އެއް އަހަރު ތެރޭގައި މައުލޫމާތު ނެގުމުގެ މަސައްކަތް ކުރުމަށްފަހު، އޭގެ އަނެއް ދެ އަހަރު، އެ ޕްލޭން ތަންފީޒު ކުރުމުގެ މަސައްކަތް ކުރެވިގެންދާނެ ކަމަށް އިހްސާން ވިދާޅުވިއެވެ.
Advertisement
This content is created and paid for by advertisers and does not involve Voice Journalists
