ދެކުނު އެމެރިކާގެ ގައުމެއް ކަމަށްވާ ބްރެޒިލް އަށް ބޯކަށް ވާރޭވެހި ފެންބޮޑުވުމުގެ ސަބަބުން މަރުވި މީހުންގެ އަދަދު 136 އަށް އަރައިފިއެވެ.

ބްރެޒިލް ސަރުކާރުގެ ލޯކަލް ސިވިލް ޑިފެންސް އިން މިފަދައިން ހާމަކޮށްފައިވާއިރު، މިދިޔަ ހުކުރު ދުވަހާއި ހިސާބަށް އެގައުމުން ވަނީ 126 މީހަކު މަރުވެފައެވެ.

ބްރެޒިލް އަށް ބޯކޮށް ވާރޭވެހި ތޫފާންތަކުގެ އަސަރު ކުރުމުގެ ސަބަބުން އެގައުމުގެ 537,000 މީހެއް ވަނީ ބޯހިޔާވަހިކަމުން މަހުރޫމް ވެފައެވެ. ހަމައެއާއިއެކު، ގާތްގަނޑަކަށް 446 އާބަން ސެންޓަރަށް އަސަރުކޮށް، ބްރެޒިލްގެ އާބާދީގެ 10.9 މިލިއަން މީހުންގެ ތެރެއިން 2.1 މީހުންނަށް ވަނީ އޭގެ ގެއްލުމާއި ކުރިމަތިލާން ޖެހިފައެވެ.

ބްރެޒިލްގެ މޫސުމާ ބެހޭ އިދާރާތަކުން ރިޕޯޓްކުރާ ގޮތުގައި ކުޑަ ވަގުތުކޮޅަކަށް ވާރޭ ހުއްޓާލުމަށް ފަހު މިދިޔަ ހުކުރު ދުވަހު އަނެއްކާވެސް އެގައުމަށް ވާރޭ ވެހެން ފެށުމުގެ ސަބަބުން އެގައުމުގެ ކޯރުތައް ވަނީ ބަންޑުން ވެފައެވެ. އެކަމާއި ގުޅިގެން އެ އިދާރާތަކުން ކަންބޮޑުވުން ފާޅުކޮށްފައިވާއިރު، އަދިވެސް ބްރެޒިލްގެ ބެސިން ތަކާއި ކޯރުތައް ހުރީ އެހާލަތުގައި ކަމަށް އެ ފަރާތްތަކުން ބުނެއެވެ.

މިދިޔަ ހަފްތާއިން ފެށިގެން ބްރެޒިލް އަށް ވެހެންމުންދާ ވާރެއާއި ގުޅިގެން 754 މީހުން ޒަހަމްވެ  134 މީހުން ވަނީ ވީނުވީއެއް ނޭނގި ގެއްލިފައެވެ.

ހަމައެއާއިއެކު މި ކާރިސާގެ ތެރޭގައި ވެސް މީހުން ކުށްތަކަށް އަރައިގަތުމުގެ ސަބަބުން ދަނީ ހައްޔަރު ކުރެވެމުންނެވެ. މިގޮތުން ވައްކަމާއި ފޭރުމުގެ މައްސަލަ އާއި ގުޅިގެން 47 މީހުން ހައްޔަރުކޮށްފައިވާއިރު، އޭގެ ތެރެއިން 6 މީހުންނަކީ މި ކާރިސާގައި ގެދޮރު ގެއްލިގެން ދިޔަ މީހުންނަށް ޖިންސީ ގޯނާ ކުރި ކަމަށް ތުހުމަތު ކުރެވޭ މީހުންނެވެ.

ބްރެޒިލް އަށް ކުރަމުންދާ ވިއްސާރަ އަދިވެސް ގޯސްވާނެ ކަމަށް ލަފާކޮށް، އެގައުމުގެ ކަމާ ބެހޭ ފަރާތްތަކުން އަންނަނީ ވާރޭގެ ސަބަބުން ގެއްލުންވި ގެތަކުގެ މީހުން މިވަގުތަށް އެނބުރި އެ ގެތަކަށް ނައުމަށް އިލްތިމާސް ކުރަމުންނެވެ.

މި ވިއްސާރައިގެ އަސަރު ބްރެޒިލްގެ އަވައްޓެރި ގައުމެއް ކަމަށްވާ އުރުގުއޭ އަށްވެސް ކޮށް އެގައުމުގެ 1,347 މީހުން ބޯހިޔާވަހިކަމުން މަހުރޫމްވެ، އެތައް ބަޔަކަށް ކަރަންޓުގެ ޚިދުމަތް ވަނީ މެދިކެނޑިފައެވެ.