މިއަހަރުގެ ޖުލައި މަހުގެ ތެރޭގައި ރާއްޖޭގައި ފުރަތަމަ ފަހަރަށް ޑިވެލޮޕްމެންޓް ބޭންކެއް ހުޅުވިގެންދާނެ ކަމަށް އިގުތިސާދީ ކަންކަމާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.
މިއަދު ބޭއްވި ސްޕެޝަލް އިކޮނޮމިކް އެންޑް ފައިނޭންޝަލް ސަރވިސަސް ޒޯން ތަރައްޤީ ކުރުމުގެ އެއްބަސްވުމުގައި ސޮއިކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ސައީދު ވިދާޅުވީ މިއީ ރާއްޖޭގެ ތާރީހު ބޮޑު ތަނުން ބަދަލުކޮށްލެވޭނެ މަޝްރޫއުއެއް ކަމަށެވެ.
"ރާއްޖޭގައި ފުރަތަމަ ފަހަރަށް ޑިވެލޮޕްމެންޓް ބޭންކެއް އިރާދަކުރެއްވިއްޔާ ޖުލައި މަސް ތެރޭގައި ހުޅުވިގެންދާނެ. ރާއްޖޭގެ ތާރީހު އިރާދަކުރެއްވިއްޔާ ބޮޑުތަނުން ބަދަލު ކުރެވޭނެ މަޝްރޫއެއް."
ވަޒީރު ސައީދު ވިދާޅުވިއެވެ.
ވަޒީރު ސައީދު ވިދާޅުވީ، ސަރުކާރުގެ އިތުރަށް ޕްރައިވެޓް ޕްލޭސްމަންޓް ހެދުމުން މި ބޭންކްގައި އިންވެސްޓް ކުރާނެ ފަރާތްތައް ލިބެމުންދާ ކަމަށާއި، އެ ފަރާތްތަކުން މި ބޭންކް ބަލައިގަނެ ބައިވެރިވާނެ ކަމުގެ ފުރިހަމަ ޔަގީންކަން މިހާރުވެސް ސަރުކާރަށް ދެމުންގެންދާ ކަމަށެވެ.
މިއީ ލިބޭ ވަރަށް ބޮޑު ކުރިއެރުމެއްކަން ފާހަގަކުރައްވަމުން ވަޒީރު ސައީދު ވިދާޅުވީ، މިޖުލައި މަހުގެ ތެރޭގައި ބޭންކް ގެ އޮޕަރޭޝަން ފެށޭނެކަމަށް ބެލެވޭ ކަމަށެވެ.
Advertisement
This content is created and paid for by advertisers and does not involve Voice Journalists
