ރާއްޖޭގެ ފަރުތަކުގައިވާ ގާތައް ހުދުވާތީ އެންވާރަމެންޓް ޕްރޮޓެކްޝަން އެޖެންސީ (އީޕީއޭ) އިން އެޅި ފިޔަވަޅުތަކަށް މޯލްޑިވްސް އެސޯސިއޭޝަން އޮފް ޓުއަރިޒަމް އިންޑަސްޓްރީ (މަސީ) އާއި މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަޓީ) އިން ވެސް ތާއީދުކޮށްފިއެވެ.

މި ދުވަސްވަރަކީ ކަނޑުތަކުގެ ލޮނުގަނޑުގެ ހޫނުމިން މަތިވުމުގެ ސަބަބުން ފަރުތަކުން ގާހުދުވަމުންދާ ދުވަސްވަރަކަށްވާތީ އީޕީއޭއިން ވަނީ ގާހުދުވުމާއި (ކޮރަލް ބްލީޗިންގ) ގުޅިގެން ފަރުތަކަށް ކުރާ ނޭދެވޭ އަސަރު ކުޑަކުރުމުގެ ގޮތުން ފިޔަވަޅު އެޅުމަށް ނިންމައި އެކަމާއި ގުޅޭ ނޫސްބަޔާނެއް މިމަހުގެ 9 ވަނަ ދުވަހު އާއްމުކޮށްފައެވެ.

މި ނޫސްބަޔާނުގައި ދިވެހިރާއްޖޭގެ ސަރަހައްދު އޮތީ "އެލާރޓް ލެވަލް 1" ގައިކަން ފާހަގަކޮށް އީޕީއޭއިން ބުނީ ގިނަ އަދަދަކަށް ގާހުދުވަމުންދާ ކަމަށް ރިޕޯރޓް ލިބެމުންދާތީ ފަރުތަކަށް ކުރާ ނޭދެވޭ އަސަރު ކުޑަކުރުމުގެ ގޮތުން 10 ޖޫން 2024 ވަނަ ދުވަހުގެ ނިޔަލަށް ފިޔަވަޅު ތަކެއް އެޅުމަށް ނިންމާފައިވާ ކަމަށެވެ.

އޭގެ ތެރޭގައި ތަރައްޤީގެ މަޝްރޫޢުތަކުގެ ތެރެއިން ފަރުތަކަަށް ސީދާ އަދި ނުސީދާ ގޮތުން އަސަރުކުރާ މަސައްކަތްތަކަށް އީ.އައި.އޭ އާއި ބިންހިއްކުމާއި ފަޅު ފުންކުރުމުގެ ހުއްދައިގައި ބަޔާންކޮށްފައިވާ ގޮތުގެ މަތިން ވަގުތީ ގޮތުން ހުއްޓާލުމާއި ބިންހިއްކުން، ފަޅުކޮނުން، ގޮނޑުދޮށަށް ވެލިއެޅުން، ޕަމްޕު ބޭނުންކޮށްގެން ވެލި ނެގުން، ފަރުމަތީ ހޮޅި އަދި ކޭބަލް އެޅުން، ބަންޑުވޯލް ޖެހުން ހުއްޓާލުމުގެ އިތުރުން މެޝިނަރީ ބޭނުންކޮށްގެން ފަރުމަތީގައި މަސައްކަތް ކުރުން ފަދަ މަސައްކަތްތަކަށް އީ.އައި.އޭ އަދި ހުއްދަ ދޫކުރުން ވަނީ އީޕީއޭ އިން ކަނޑައެޅި މުއްދަތަށް ހުއްޓާލާފައެވެ.

އީޕީއޭގެ މި ފިޔަވަޅު ތަކަށް ތާއީދުކޮށް، މަޓީ އާއި މަސީން ނެރުނު ނޫސް ބަޔާނުގައި، މިއީ ރާއްޖޭގެ ފަރުތައް ހިމާޔަތްކޮށް، ތިމާވެށި ދެމެހެއްޓެނިވިގޮތެއްގައި ބެލެހެއްޓުމަށް މުހިއްމު ފިޔަވަޅުތަކެއްކަން ފާހަގަކޮށް އެ ދެ ޖަމިއްޔާގެ މެމްބަރުން މި ނިންމުމަށް ތާއީދު ކުރުމަށް ވަނީ ގޮވާލާފައެވެ.

ހަމައެއާއިއެކު މި ފިޔަވަޅު ތަކަކީ ގާތައް ހުދުވެ، ފަރުތަކަށް ކުރަމުންދާ ނޭދެވޭ އަސަރުތައް ކުޑަކުރެވޭނެ ފިޔަވަޅު ތަކެއް ކަމަށް މަޓީ އާއި މަސީން ނެރުނު ނޫސްބަޔާނުގައި ވަނީ ފާހަގަކޮށްފައެވެ.