ހުޅުމާލޭ އެކި ސަރަހައްދުތަކުއި ޤަވައިދާ ޚިލާފަށް ބަހައްޓާފައިވާ ތަކެތި ނަގަން އެޗްޑީސީއިން އަންގައިފިއެވެ.

ހައުސިން ޑިވެލޮޕްމަންޓް ކޯޕަރޭޝްން (އެޗްޑީސީ) އިން މިއަދު އަންގާފައިވަނީ ހުޅުމާލޭގެ ފުރަތަމަ ފިޔަވަހީގެ ސިނާއީ ސަރަހައްދުގެ ދުވާރުމަތީގައި ހައުސިން އެ ކޯޕަރޭޝަނުގެ ހުއްދަ ނެތި ބަހައްޓާފައިތަކެތި ނެގުމަށެވެ.

އެގޮތުން ހުޅުމާލޭ ފުރަތަމަ ފިޔަވަހީގެ ސިނާއީ ސަރަހައްދުގެ ދުވާރު މަތީގައި، ޤަވާއިދާ ޚިލާފަށް ބަހައްޓާފައި ހުރި އެއްޗެހި 30 ދުވަސް ތެރޭގައި ނެގުމަށް އެޗްޑީސީއިން ވަނީ އަންގާފައެވެ.

މީގެ އިތުރުން ހުޅުމާލޭ ދެވަނަ ފިޔަވައްސާއި ތިންވަނަ ފިޔަވަހީގެ ހުސް ބިންތަކުގައިވެސް ގަވާއިދާ ހިލާފަށް ބަހައްޓާފައިވާ ތަކެތި ނަގަން އެ ކޯޕަރޭޝަނުން ވަނީ އަންގާފައެވެ.

މިކަމާ ގުޅޭގޮތުން އެޗްޑީސީއިން މިއަދު ބުނެފައިވަނީ ސިނާއީ ސަރަހައްދުގައި ގަވައިދާ ހިލާފަށް ދިގު މުއްދަތަކަށް ތަކެތި ބަހައްޓަމުން ދިއުމުގެ ސަބަބުން އެ ސަރަހައްދުގައި މަސައްކަތްކުރާ ފަރާތްތަކަށާއި އަދި ހިދުމަތް ހޯދާ ފަރާތްތަކަށް ގިނަ ދަތިތައް ކުރިމަތިވާކަމުގެ ޝަކުވާ އެ ކޯޕަރޭޝަނަށް ލިބެމުން އަންނަ ކަމަށެވެ.

ހުޅުމާލޭ ދެވަނަ ފިޔަވައްސާއި ތިންވަނަ ފިޔަވަހީގައި އެޗްޑީސީއިން ކުރިއަށް ގެންދަން ކަނޑައަޅާފައިވާ މަޝްރޫޢުތައް ފެށުމަށްޓަކައި، ބިން ހުސްކުރުމުގެ މަސައްކަތް ވެސް ކުރިއަށް ގެންދިއުމަށް ވަނީ ހަމަޖެހިފައެވެ. އެހެންކަމުން ދެވަނަ އަދި ތިންވަނަ ފިޔަވަހީގެ ހުސް ބިންތަކުގައި ގަވައިދާ ހިލާފަށް ތަކެތި ބަހައްޓައިގެން ބޭނުން ކުރުމަކީ މަނާކަމެއް ކަމާއި، މިގޮތަށް ބިންތައް ބޭނުން ކުރާ ފަރާތްތަކުން 7 ޖޫން 2024 ގެކުރިން އެފަދަ ތަކެތި ނަގައި ބިން ސާފުކޮށްދިނުމަށް އެދޭކަމަށް އެޗްޑީސީއިން ބުނެފައިވެއެވެ.