ފާއިތުވި 24 ގަޑިއިރު ތެރޭގައ އެންމެ ބޯކޮށް ވާރޭ ވެހުނީ ލ.ކައްދޫއަށް ކަމުގައި މޫސުމާއި ބެހޭ ގައުމީ އިދާރާ (މެޓް އޮފީސް) އިން ހާމަކޮށްފިއެވެ. 

އެ އިދާރާއިން ހާމަކުރި ތަފާސްހިސާބުތަކަށް ބަލާއިރު ފާއިތުވި 24 ގަޑިއިރު ތެރޭގައި ކައްދޫ އަށް ޖުމްލަ 135.7 މިލިމީޓަރުގެ ވާރޭ ވެހިފައިވާއިރު ދެވަނަ އަށް އެންމެ ބޯކޮށް ވާރޭ ވެހުނު އދ. މާމިގިލި އަށް 109.5 މިލިމީޓަރުގެ ވާރެ ވެހިފައިވެއެވެ. ތިން ވަނަ އަށް އެންމެ ގިނައިން ވާރޭ ވެހުނު ރަށަކީ ފ.ނިލަންދޫ އަށް ވާއިރު ފާއިތުވި 24 ގަޑިއިރު ތެރޭގައި އެރަށަށް ވަނީ 59.3 މިލިމީޓަރުގެ ވާރޭ ވެހިފައެވެ.

ރާއްޖޭގެ އެހެން ހިސާބުތަކަށް ބަލާ އިރު، ފާއިތުވި 24 ގަޑިއިރު ތެރޭގައި ދެން އެންމެ ބޯކޮށް ވާރޭ ވެހުނީ މ.މުލި (47.8 މިލިމީޓަރު)، ގއ. ގެމަނަފުށި (31.4 މިލިމީޓަރު)، ގދ.ކާޑެއްދޫ އާއި ށ.ކޮމަންޑޫ (26.7 މިލިމީޓަރު) އަށެވެ.

Advertisement

މެޓް އޮފީހުން ބުނީ މިއަދު ރާއްޖޭގެ ބޮޑު ބަޔަކަށް ވިއްސާރަ ކުރުމާއި އެކު ގުގުރާނެ ކަމަށާއި އަދި ބައެއް ރަށްތަކަށް ބޯކޮށްވާރޭ ވެހުމަކީ އެކަށީގެންވާ ކަމެއް ކަމަށެވެ. 

ވިލާގަނޑުގައި 40 މޭލަށް ވައިގަދަވުން އެކަށީގެންވާއިރު، އުތުރުގެ ކަނޑުތައް އާދައިގެ ވަރަށް މަޑުވެފައި ވިލާގަނޑު ގަދަވިނަމަވެސް، އެހެން ހިސާބުތަކަށް ކަނޑުތައް އާދައިގެ ވަރަކަށް ގަދަވެފައި ވިލާގަނޑުވެސް ގަދަވާނެ ކަމަށް އެ އިދާރާއިން ލަފާ ކުރެއެވެ.

އުތުރުގެ ސަރަހައްދުގައި ރާޅު 5-2 ފޫޓާއި އާއި ދެމެދަށް އުސްވާނެ ކަމަށާއި، ދެކުނުގެ ކަނޑުތަކުގައި ރާޅު 7-4 ފޫޓާއި ދެމެދަށް އުސްވާނެ ކަމަށް ލަފާކޮށް މޫސުމާއި ބެހޭ އިދާރާއިން ވަނީ ހުރިހާ ފަރާތްތަކުން މޫސުމަށް ސަމާލުވުމަށް އިލްތިމާސްކުރައްވާފައެވެ.