'ދިރިއުޅުމުގެ ކޮންމެކަމެއްގައިވެސް އެންމެ އިސްކުރާ ސިޔާސަތަކަށް ‘ފުރަތަމަ ޢާއިލާ' ހެއްދެވުމަށް އިޖުތިމާޢީ އަދި ޢާއިލީ ތަރައްޤީއާބެހޭ ވުޒާރާގެ ވަޒީރު ޑރ. ޢާއިޝަތު ޝިހާމް އެދިވަޑައިގެންފިއެވެ. 

ވަޒީރު މިހެން ވިދާޅުވެފައި ވަނީ، ބައިނަލްއަޤްވާމީ ޢާއިލާތަކުގެ ދުވަހުގެ ތަހުނިޔާ ދިވެހި ހުރިހާ ޢާއިލާތަކަށް އަރިސްކުރައްވައި މިއަދު ދެއްވި ޚިތާބުގައެވެ.  

ވަޒީރުގެ ޚިތާބުގައި ވިދާޅުވީ، އޯގާތެރި މުޖުތަމަޢެއްގެ އެންމެ މުހިންމު އެއް ސިފައަކީ ބަދަހި ޢާއިލާއެއް ކަމަށެވެ. އެހެންކަމުން ޢާއިލާތަކަކީ އަޚުވަންތަކަމާއި އެއްބަނޑު އެއްބަފާވަންތަކަން ދަމަހައްޓާ، އެކަކު އަނެކަކަށްއަޅާލާ އޯގާތެެރި، އެހީތެރި، ކުލުނުވެރި، އެންމެން އެކުގައިގުޅިގެން އުޅޭ ޢާއިލާތަކަކަށް ވާންޖެހޭ ކަމަށެވެ. 

Advertisement

މިއާއެކު ވަޒީރު ވިދާޅުވީ ޢާއިލާގެ ހަމަޖެހުމާއި އުފާވެރިކަމަކީ މުުޖުތަމަޢުގެ ކުރިއެރުމާއި ޤައުމުގެ ތަރައްޤީގެ އަސްލުކަން ފާހަގަކުރައްވާފައެވެ. 

މީގެ އިތުރުން އެންމެންނަކީވެސް، ބޮޑުބޭބެއިންނާއި ބޮޑުދައިތައިން، އެއްބަނޑު އެއްބަފާބޭބެއިންނާއި ދައްތައިން އަދި ކޮއްކޮއިންގެ ހާލުބަލާލާބަޔަކަށްވެ، ދަރިންނާއި އަނބިން އަދި ފިރިންނަށްވަގުތުދޭ، އެމީހުންނާއެކު އުފާވެރި ވަގުތުތަކެއް ހޭދަކުރުމަށްއިސްކަންދޭ ބަޔަަކަށްވުމަށް ވެސް ވަޒީރު އެދުވަޑައިގެންނެވިއެވެ. 

ހަމަ އެހެންމެ، އެކި ސަބަބުތަކާހުރެ ޢާއިލާ ރޫޅި، ދެމަފިރިން ވަކިވާން ޖެހޭ ޙާލަތު ދިމާވެފައިވާ ޢާއިލާތަކުންވެސް، އެޢާއިލާތަކުގެ ކުދިންނާ އެކުދިންގެ މައިންބަފައިންނާމެދު އޮންނަ ގުޅުން ބަދަހިކޮށް ކޮންމެ ޢާއިލާއަކީވެސް އެކުގައި އުޅުނަސް، ނުވަތަ ދުރުގައި އުޅެންޖެހިފައި ވީނަމަވެސް ޢާއިލީ ގުޅުން ދަމަހައްޓާ، އިޙްތިރާމާއި ލޯތްބާއެކު އެކަކު އަނެކަކަށް އެހީތެރިވާ ބަޔަކު ކަމުގައިވުމަށް ވަޒީރު އައިޝަތު ޝިހާމް އެދުވަޑައިގެންނެވިއެވެ.