ޓޭބަލް ޓެނިސްގެ ތަރި ފާތިމަތު ދީމާ، އޮލިމްޕިކްސްއަށް ކޮލިފައިވި ފުރަތަމަ ދިވެހި އެތުލީޓުގެ ޝަރަފާއެކު، މުޅި ރާއްޖެ ފަޚުރުވެރިކުރުވައިފިއެވެ.
ފާތިމަތު ދީމާ، މި އަހަރު ފްރާންސްގެ ވެރިރަށް ޕެރިހުގައި އޮންނަ އޮލިމްޕިކްސް އަށް ކޮލިފައިވެފައިވަނީ ދެކުނު އޭޝިއާ ކޮލިފިކޭޝަންސްގެ ސިންގަލްސްގެ ޗެމްޕިއަންކަން ހޯދައިގެންނެވެ.
މިއަދު މެންދުރު ފަހު ކުރިއަށް ދިޔަ، ކޮލިފިކޭޝަނުގެ ފައިނަލުން، ދީމާ، 1-4 ސެޓުން މެޗު ކާމިޔާބުކޮށް، އޮލިމްޕިކްސް ގައި ވާދަކުރަން ހޮވުނު އިރު މިއީ ދިވެހި ތާރީޚުގައި ވެސް ދިވެހި އެތުލީޓަކު އޮލިމްޕިކްސް އަށް ކޮލިފައިވި ފުރަތަމަ ފަހަރުކަން ފާހަގަ ކޮށްލެވެއެވެ.
ދީމާގެ މި ކާމިޔާބީ ފާހަގަ ކުރުމުގެ ގޮތުން، ރާއްޖޭގެ ގިނަ އިސްވެރިންތަކެއް ވަނީ ދީމާއަށް މަރުޙަބާ ވިދާޅުވެފައެވެ. އެގޮތުން، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒާއި ނައިބު ރައީސް ހުސައިން މުޙައްމަދު ލަޠީފު ވެސް ވަނީ ދީމާއަށް ތަހުނިޔާ ވިދާޅުވެފައެވެ.
ދީމާގެ މި ކާމިޔާބީއަ ގުޅިގެން ރާއްޖޭގެ ނައިބު ރައީސް ހުސައިން މުޙައްމަދު ލަޠީފު އެކްސްގައި ކުރެއްވި ޕޯސްޓެއްގައި ވިދާޅުވީ، ދީމާއަށް ވަރަށް ހޫނު މަރުޙަބާއެއް ކިޔާ ކަމަށާއި މިއީ ޤައުމަށް ލިބުނު ބޮޑު ފަޚުރެއް ކަމަށެވެ. އަދި މި ފަޚުރަކީ، ދީމާއާއި، އޭނާގެ އާއިލާ އަދި ޓޭބަލް ޓެނިސް އެސޯސިއޭޝަނާއި ރާއްޖޭގެ އޮލިމްޕިކް ކޮމިޓީގެ މިންނެތް މަސައްކަތް ކަމަށްވެސް ނައިބު ރައީސް ވިދާޅުވިއެވެ.
ދިވެހިރާއްޖެއިން އޮލިމްޕިކްސް އަށް ކޮލިފައިވި ފުރަތަމަ އެތުލީޓުގެ ޝަރަފު ދީމާ ހޯދާފައިވާއިރު، އޭނާ އަކީ ރާއްޖޭހެ އޮލިމްޕިކް ކޮމިޓީން ދިން ޕެރިސް އޮލިމްޕިކްސް ސްކޮލަޝިޕް ލިބުނު އެތުލީޓެކެވެ. ކޮލިފިކޭޝަން ބުރު ކާމިޔާބު ކުރުމާއިއެކު ދީމާ އަށް މިވަނީ އަންނަ ޖުލައި މަހު ފެށުމަށް ހަމަޖެހިފައިވާ އޮލިމްޕިކްސް ގައި ވާދަކުރުމަށް ފުރުސަތު ލިބިފައެވެ.
Advertisement
This content is created and paid for by advertisers and does not involve Voice Journalists
