އަންހެނަކު އޭނާގެ ދަރިފުޅުގެ ހާލު ދެރަވެގެން، އެ ކުއްޖާ އުރައިގެން ހޮސްޕިޓަލަށް ގެންދާތަން ފެނިގެން، ސިފައިންގެ މީހަކު އެ ކުއްޖާ އަތްދަނޑި މަތީގައި ބާއްވައިގެން ދުވެފައި ހޮސްޕިޓަލަށް ގެންގޮސްދިނުމުން ގިނަ ބައެއްގެ ތައުރީފް ސިފައިންގެ މީހާއަށް އޮހެން ފަށައިފިއެވެ. 

މި ހާދިސާ ހިނގިގޮތް ހާމަކޮށް އެ ކުޑަކުއްޖާގެ ބައްޕަ މީސްމީޑިއާގައި ކުރި ޕޯސްޓުގައި ބުނެފައިވާ ގޮތުން، ހާދިސާ ހިނގާފައި ވަނީ މި މަހުގެ އަށް ވަނަ ދުވަހުގެ އިރު އޮއްސުނު ވަގުތު އެވެ.

އެގޮތުން ދަރިފުޅު ފިޓު ޖެހުނު ވަގުތު ގޭގައި ހުރީ އޭނާގެ އަންހެނުން އެކަނި ކަމަށާ، އަންހެންނުން ދަރިފުޅު ހޮސްޕިޓަލަށް ގެންދަން އުރާލައިގެން ތިރިއަށް ފޭބިތަނާ އެ މަންޒަރު ކޯސްޓްގާޑުގެ ކޯޕްރަލް މުހައްމަދު ހިޝާމް އަހުމަދަށް އެ މަންޒަރު ފެނުނު ކަމަށް ޕޯސްޓުގައި ބުނެފައިވެއެވެ. 

Advertisement

އަދި ހިޝާމަށް އެ މަންޒަރު ފެނުމާއެކު ވަގުތުން ހިޝާމް ވަނީ އެ ކުއްޖާގެ މަންމަ އަތުން ދަރިފުޅު ނަގައި، އޭނާގެ އަތްދަނޑި މަތީގައި ބާއްވައިގެން ދުވެފައި އޭޑީކޭ ހޮސްޕިޓަލާ ހިސާބަށް ގެންގޮސްދީފައިވާ ކަމަށްވެސް ކުއްޖާގެ ބައްޕަ ބުންޏެވެ. 

ހިޝާމްގެ އެ އެހީތެރިކަމަށް އެ ކުއްޖާގެ ބައްޕަ ވަނީ ވަރަށް ބޮޑަށް ޝުކުރު އަދާކޮށްފައެވެ. އަދި އެއީ އިންސާނިއްޔަތަށް ޓަކައި އޭނާ ކޮށްދިން ވަރަށް ބޮޑު ކަމެއް ކަން ފާހަގަކޮށް ހިޝާމްގެ އާއިލާ ހެޔޮގޮތާއި ބާއްޖަވެރި މުސްތަގުބަލެއް ދެއްވުމަށް އެދި ވަނީ ދުޢާކޮށްފައެވެ. 

ކުއްޖާގެ ބައްޕަގެ ޝުކުރުގެ ޕޯސްޓާއެކު ގިނަ ބަޔަކު އަންނަނީ ހިޝާމަށް ތައުރީފު ކުރަމުންނެވެ. އަދި އޭނާގެ އިތުރުން އެމްއެންޑީއެފްއަށް ވެސް އެކަމުގެ ޝުކުރު އެއްބަޔަކު ވަނީ އަދާކޮށްފައެވެ.