ދައުލަތަށް ހަރަދު ކުޑަވާ ގޮތަށް ހޮސްޕިޓަލުތަކުގެ ކުރެހުންތަކަށް ބަދަލުތަކެއް ގެނައުމަށް ނިންމާފައިވާކަމަށް ސިއްހަތާއި ބެހޭ ވަޒީރު ޑރ.އަބްދުﷲ ހަލީލް ވިދާޅުވެއްޖެ އެވެ.

ސިއްހަތާއި ބެހޭ ވުޒާރާއިން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު ޚަލީލް ވިދާޅުވީ، ކުރީގެ ރައީސް އިބްރާހިމް މުޙައްމަދު ޞާލިހުގެ ސަރުކާރުން  އެވޯޑު ކޮށްފައިވާ ހޮސްޕިޓަލްގެ ކުރެހުންތައް ހުރީ ވަރަށް "ފެންސީ" ކޮށް ކަމަށާއި, ކުރީގެ ސަރުކާރުން ވަރަށް ގިނަ ޕްރޮޖެކްޓްތައް އެކި ފަރާތްތަކާ ހަވާލުކޮށްފައިވާއިރު އޭގެ ތެރޭގައި 30 އެނދު އަދި 50 އެނދުގެ ހޮސްޕިޓަލް ހިމެނޭ ކަމަށެވެ.

އެހެންނަމަވެސް ރައީސް ޞާލިހުގެ ވެރިކަން ނިމުނު އިރުވެސް އޭގެ ގިނަ މަސައްކަތްތަކެއް ފެށިފައިނުވާއިރު، ވަޒީރު ޚަލީލް ވިދާޅުވީ ހޮސްޕިޓަލްތައް ޑިޒައިންކޮށްފައި ހުރީ ވަރަށް "ފެންސީ" ކޮށް ކަމަށްވާތީ ސަރުކާރުން އެ ޑިޒައިންތައް ބަދަލު ކުރާނީ ހަރަދު ކުޑަކޮށް ނަމަވެސް ހުރިހާ ހިދުމަތްތަކެއް ފުރިހަމައަށް ލިބޭނެހެން ކަމަށެވެ. އެގޮތުން ކުރަހާފައި ހުރި ކުރެހުންތައް ރީޑިޒައިންކޮށް، ދައުލަތަށް ވެސް އަދި އާއްމުންނަށް ވެސް ފަސޭހަވާނެ ގޮތަށް ބަދަލުތައް ގެންނަމުން އަންނަ ކަމަށް ވަޒީރު ވިދާޅުވިއެވެ.

ޑިޒައިނަށް ގެންނަ ބަދަލަކާ އެކު، އަގުތަކަށް ވެސް ވަރަށް ބޮޑު ބަދަލެއް އަންނަކަން ފާހަގަކުރައްވަމުން ވަޒީރު ޚަލީލް ވިދާޅުވީ،  އިމާރާތް ހެދުމަށް ދާ ހަރަދު ކުޑަކުރުމަށް ފަހު، ގިނަ ރަށްރަށުގައި ރައްޔިތުން ބޭނުންވާ އިންފްރަސްޓްރަކްޗާގެ ގިނަ މަސައްކަތް ގެންދެވޭނެ ކަމަށެވެ.

މީގެ އިތުރުންވެސް، ވަޒީރު ޚަލީލް ވަނީ ހަރަދުތައް ކުޑަކުރަން ހޮސްޕިޓަލް ތަކުގައި ހިމަނާފައި ހުރިއެކޮމޮޑޭޝަން ބައިތައް އުނިކުރަން ނިންމި ނަމަވެސް، ފުޅާ ދާއިރާއެއްގައި ޓޫރިޒަމްގެ ވިޔަފާރި ކުރާ ސަރަހައްދުތަކުގައި ޑޮކްޓަރުންނަށް ހާއްސަ ކޮށްގެން އެކޮމޮޑޭޝަން ހަދާނެ ކަމަށް ވިދާޅުވެފައެވެ.