ސްލޮވާކިއާގެ ބޮޑުވަޒީރު ރޮބަޓް ފީކޯ އަށް ދިން ބަޑީގެ ހަމަލާ އާއި ގުޅިގެން ފުރާނަ ނުރައްކާވި ނަމަވެސް މިހާރު އެހާލަތުން އަރައިގެންފައިވާއިރު، ހާލުކޮޅު އަދިވެސް ސީރިއަސް ކަމަށް އެބޭފުޅާގެ ނައިބު ވިދާޅުވެއްޖެއެވެ.

އުމުރުފުޅުން 59 އަހަރުގެ ރޮބަޓް ފީކޯ އަށް އަމާޒުކޮށް ފަސް ފަހަރު ހަމަލާދީފައިވާއިރު، އެބޭފުޅާ އަށް މި ހަމަލާދީފައިވަނީ އާއްމުންނާއި ބައްދަލުކުރައްވަން ހުންނަވަނިކޮށް، ސެކިއުރިޓީ ބެރިއާގެ ބޭރުގައި ހުރި މީހެކެވެ.

އާއްމުވެފައިވާ ވީޑިއޯ ތަކުން ފެންނަ ގޮތުގައި ބޮޑު ވަޒީރުގެ ގަޔަށް ބަޑި ޖެހުމާއި އެކު، ބޮޑީގާޑުން ވަގުތުން އެބޭފުޅާ ކާރަށް އަރުވައިގެން ގެންދެއެވެ. އަދި ބަޑި ޖެހިމީހާ ވެސް ހައްޔަރުކޮށްފައިވާއިރު، އެގައުމުގެ މީޑިއާތަކުން ރިޕޯޓް ކުރާ ގޮތުގައި އެއީ އުމުރުން 71 ފިރިހެނެކެވެ.

ހަމަލާއާއި ގުޅިގެން ފީކޯ ފުރަތަމަ ގެންދެވުނީ ލޯކަލް ހޮސްޕިޓަލަކަށެވެ. އެއަށް ފަހު ވައިގެ މަގުން  ބާންސްކާ ބިސްޓްރިކާ ސިޓީގައި ހުންނަ ބޮޑު ޓްރޮމާ ސެންޓަރަކަށް އެބޭފުޅާ ބަދަލުކުރެވި، 5 ގަޑިއިރަށްވުރެ ގިނައިރުގެ ސާޖަރީއެއް ވަނީ ކޮށްފައެވެ.

އެ ހޮސްޕިޓަލުގެ ޑިރެކްޓަރު މިރިއަމް ލަޕުނިކޯވާ ވިދާޅުވީ، ފީކޯ ސްޓޭބަލް ވެފައި އޮތް ނަމަވެސް އަދިވެސް އޮތީ ވަރަށް ސީރިއަސް ހާލަތެއްގައި ކަމަށްވާތީ އެބޭފުޅާ އަށް ފަރުވާދެމުންދަނީ އައިސީޔޫގައި ކަމަށެވެ.

މީގެ ކުރިންވެސް އެގައުމުގެ ބޮޑުވަޒީރު ކަމުގެ މަގާމު ފީކޯ ފުރުއްވާފައިވާއިރު، މިއީ އެބޭފުޅާގެ ތިން ވަނަ ދައުރުކަން ފާހަގަކޮށްލަން ޖެހެއެވެ.