ދިވެހިބަހާއި ސަގާފަތާއި ތަރިކައާ ބެހޭ މިނިސްޓްރީ އާއި ގުޅިގެން ބޮޑު އީދު ފާހަގަކުރުމަށް ޝައުގުވެރިވާ ރަށްރަށުން އެކަމަށްއެދި ޕްރޮޕޯޒަލް ހުށަހެޅުމުގެ ފުރުޞަތު ހުޅުވާލައި ކުރި އިއުލާނާއި ގުޅިގެން 26 ރަށަކުން ޕްރޮޕޯޒަލް ހުށަހަޅާފައިވާ ކަމަށް އެ މިނިސްޓްރީން ބުނެފިއެވެ.

ގައުމިއްޔަތު މިނިސްޓްރީން ބުނީ، އެ މިނިސްޓްރީގެ ފަރާތުން މިއަހަރު އަޟްޙާ ޢީދު ފާހަގަ ކުރުމަށް ރާއްޖޭގެ ތިން ރަށެއް ކަނޑައެޅުމަށް ހަމަޖެހިފައިވާ ކަމަށާއި، ރަށްތައް ކަނޑައެޅުމުގައި ބަލާނެ ކަންތައްތަކުގެ ތެރޭގައި، ޢީދުގައި އެރަށަކުން ކުޅޭނެ ކުޅިވަރުތަކަށާއި، ކުރާނެ ޚަރަދުތަކާއި، އަގެއް ނުނަގައި އެރަށަކުން ކޮށްދޭނެ ކަންތައްތައް ހިމެނޭ ކަމަށް އެ މިނިސްޓްރީން ކުރި އިއުލާނުގައި ބުނެފައިވާ ކަމަށެވެ.

އެ އިއުލާނާއި އެކު ޕްރޮފޯޒަލްގައި ހިމެނެން ބޭނުންވާ މައިގަނޑު ބައިތައް ހިމެނޭ ލިޔުމާއި އަޟްޙާ ޢީދު ފާހަގަކުރާ ރަށްރަށް ކަނޑައެޅުމުގައި ބަލާނެ މިންގަނޑުތައް ހިމެނޭ ލިޔުން އެއްކަރުދާސް ކޮށްފައިވާ ކަމަށް އެ މިނިސްޓްރީން ވަނީ ބުނެފައެވެ.

Advertisement

އެއާއިއެކު މި އިއުލާނާއި ގުޅިގެން ރާއްޖޭގެ އުތުރުން 7 ރަށަކާއި، މެދުރާއްޖެތެރެއިން 10 ރަށަކާއި، ރާއްޖޭގެ ދެކުނުން 9 ރަށަކާއެކު ޖުމްލަ 26 ރަށަކުން ހުށައެޅުން ލިބިފައިވާ ކަމަށާއި، އިއުލާނުގައިވާ ސުންގަޑީގެ ފަހުން ބައެއް ރަށްރަށުން ހުށައެޅުން ފޮނުވި ނަމަވެސް އެ ހުށައެޅުންތައް ބަލައިނުގަތުމަށް ނިންމާފައިވާ ކަމަށް އެމިނިސްޓްރީން ބުނެއެވެ.

ގައުމިއްޔަތު މިނިސްޓްރީން އިތުރަށް ބުނީ މި ހުށައެޅުންތައް ބަލައި  މާކްސް ދިނުމަށް އެ މިނިސްޓްރީ އިން ޚާއްޞަ ކޮމިޓީ އެއް އެކުލަވާލައި، ި ޕްރޮޕޯޒަލްތައް ބަލައި މާކްސް ދިނުމުގެ މަސައްކަތް މިހާރު ފަށާފައިވާ ކަމަށާއި އެ މަސައްކަތް ނިންމައި، މިނިސްޓްރީ އާއި ގުޅިގެން މި އަހަރުގެ ބޮޑު އީދު ފާހަގަ ކުރާނެ ތިން ރަށެއް ފެށޭ ހަފްތާގެ ތެރޭގައި އަންގާނެ ކަމަށެވެ.