ކ.ތިލަފުށިން ފުރައިގެން މ.މެދުފުށި އައިލެންޑް ރިޒޯޓަށް ދަތުރުކުރަމުންދަނިކޮށް ގެއްލުނު "AAA-37" ނަމަކަށް ކިޔާ މުދާ އުފުލާ ދޯނި އަދިވެސް ފެނިފައިނުވާކަމަށް އެމްއެންޑީއެފުން ބުނެފިއެވެ.

އެއް ދިވެއްސަކާއި ތިން ބިދޭސީން ހިމެނޭހެން ހަތަރު މީހުންނާއި އެކު މޭ 17 ވަނަ ދުވަހުގެ ހެނދުނު 06:00 ހާއިރު ކ.ތިލަފުށިން ފުރި މި ދޯނީގެ ހަބަރެއްނުވުމާއި ގުޅިގެން އެކަމުގެ މައުލޫމާތު އެމްއެންޑީއެފަށް ލިބިފައިވަނީ އެ ދުވަހުގެ 17:20 ހާއިރެވެ.

ދޯނި ހޯދުމުގެ މަސައްކަތުގެ ތެރެއިން އިއްޔެ މޯލްޑިވިއަން ގެ ފްލައިޓެއްގެ އެހީވެސް ބޭނުންކޮށްފައިވާއިރު، އެމްއެންޑީއެފުން ބުނީ މި ދޯނި ހޯދުމުގެ މަސައްކަތުގެ ތެރެއިން މިހާތަނަށް ކަނޑާއި ވައިގެމަގުން، މީމު އަތޮޅު ރަތްމަންދޫގެ އިރުމަތީ ބިތުން ބޮޑު ސަރަހައްދެއް ބަލާފައިވާ ކަމަށެވެ.

Advertisement

އެގޮތުން ކަނޑާއި ވައިގެމަގުން 4519 ސްކެއަރ ނޯޓިކަލް މޭލު ސަރަހައްދެއް ބަލާފައިވާއިރު، މިހާތަނަށް ބެލި ބެލުމުން އަދިވެސް ދޯނީގެ ހަބަރެއްވެފައިނުވާ ކަމަށް އެމްއެންޑީއެފުން ވަނީ ބުނެފައެވެ.

މި ދޯންޏާ ބެހޭ އެއްވެސް މަޢުލޫމާތެއް ލިބިއްޖެނަމަ އެމްއެންޑީއެފް ކޯސްޓްގާޑުގެ ހިލޭ ގުޅޭ ނަމްބަރު 191 ގުޅައި މަޢުލޫމާތު ހިއްސާކުރުމަށް އެމްއެންޑީއެފުން ވަނީ އެދިފައެވެ.

މިދުވަސްވަރަކީ ރާއްޖެއަށް މޫސުން ގޯސް ދުވަސްވަރަކަށް ވާތީ ކަނޑު ދަތުރުފަތުރު ކުރާ ފަރާތްތަކުން މޫސުމަށް ސަމާލުވުމަށް ކަމާބެހޭ ފަރާތްތަކުން އަންނަނީ އިލްތިމާސް ކުރަމުންނެވެ.