މި އަހަރުގެ ބައިނަލްއަގްވާމީ ދާރުލްއާސާރު ދުވަސް ފާހަގަ ކުރުމަށް ގައުމީ ދާރުލްއާސާރުން ހާއްސަ ހަރަކާތެއް ކުރިއަށް ގެންގޮސްފިއެވެ.

ސަގާފަތާއި ތަރިކައާ ބެހޭ ވުޒާރާއިން ބުނީ މި އަހަރުގެ ބައިނަލްއަގްވާމީ ދާރުލްއާސާރު ދުވަހުގެ ޝިއާރެއްގެ ގޮތުގައި ކަނޑައަޅައިފައި ވަނީ "ތައުލީމާއި ދިރާސާއަށްޓަކައި ދާރުލްއާސާރު" ކަމަށެވެ. އަދި އެ ޝިއާރުގެ މަގުސަދަކީ ދާރުލްއާސާރުތަކުގެ ތެރެއިން އިލްމު އުނގެނެވޭނެ ގޮތްތައް ހޯދުމާއި އެކަމަށް ހިތްވަރު ދިނުން ކަމަށެވެ. 

ރާއްޖޭގެ ގައުމީ ދާރުލްއާސާރުން އެ ދުވަސް ފާހަގަކުރުމުގެ ގޮތުން ވަނީ "ޒަމާންތަކުގެ ތެރެއިން ގޮނޑި" އެ މައުލޫއުގެ ދަށުން ދަރުހެއް ވެސް ބާއްވާފައިވެއެވެ. އެ ދަރުހަކީ ގައުމީ ދާރުލްއާސާރާއި އާކިޓެކްޓް އެސޯސިއޭޝަން މޯލްޑިވަސްއާއި ރާއްޖޭގެ ގައުމީ ޔުނިވަރސިޓީގެ ފެކަލްޓީ އޮފް އިންޖިނިއަރިން، ސައިންސް އެންޑް ޓެކްނޮލޮޖީގެ ދަރިވަރުންނާއި، އޮޑިމޯ، އެޓޯލްސްކޭޕް އަދި ޑޮސައިން ގުޅިގެން އިންތިޒާމުކުރި ދަރެހެއް ކަމަށް ވެސް އެ ވުޒާރާއިން ބުންޏެވެ.

އެ ދަރެހުގައި ވަނީ އިހުގައި ބޭނުން ކުރި ގޮނޑިތަކުގެ ތާރީހާއި ވައްޓަފާޅިއަށް އިލްމީ ނަޒަރަކުން އަލިއަޅުވާލައިފައެވެ. އަދި ރާއްޖޭގައި އިހުގައި ބޭނުންކޮށް އުޅުނު އާކިޓެކްޗަރއާއި ވަޑާމުގެ އުކުޅުތަކަށް ފަންނީ ގޮތުން އަލިއަޅުވާލާފައިވެއެވެ.

އެދަރެެހުގައި ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަސީރު އިބްރާހީމް ވެސް ބައިވެރިވެވަޑައިގެން ވާހަކަފުޅު ދައްކަވާފައިވާއިރު ވަޒީރުގެ ވާހަކަފުޅުގައި މި ސަރުކާރުގެ ސިޔާސަތުގެ ދަށުން, ކުރިއަށް އޮތް ތަނުގައި މި ދާއިރާއިން ކުރެވޭ މަސައްކަތްތަކާއި, ގެނެވޭ ބަދަލުތަކުގެ ނަތީޖާއަކަށް ވާނީ, ތަރިކަ އަކީ ދިވެހީން އެއާއެކީ ދިރިއުޅޭ އެއްޗަކަށްވެ, ދިވެހީންގެ ދިރިއުޅުމުގެ ބަޔަކަށް ތަރިކަ ވުން ކަމުގައި ވިދާޅުވެފައިވެއެވެ.